拉埋香港人落水，填埋下一代落海

近期成日有人講為咗香港下一代要填海，今日我唔想講填海，剩係想講下一代。

人呢一世或多或少都被父母、教育、社會、制度、朋友、同事等各種因素影響及定型，從而得出自己同大部人都能理解嘅一套「正常」或者各種標籤，但每一個人都係獨立嘅個體，遺憾嘅係人同人係唔可能完全互相理解，你經歷過嘅事同你嘅感受，喺呢個世界係冇另一個人同你完全一樣，所以唔好隨便因為人哋外表、衣著、髮色、紋身、甚至性格去判定或者標籤另一個人。不過你點去批判或者標籤其他人都唔係大問題，畢竟係人性嘅一環。正如我所講，我想講嘅係有關下一代。希望你唔好用呢一套價值觀去教育或者批判自己下一代，令到佢成為一個同你擁有同一套價值觀嘅人，咁講並唔代表你呢一套價值觀錯誤，而係你嘅小朋友並唔係你，佢應該有選擇將來要做一個點嘅人，行一條點嘅路嘅權利。

如果你未有小朋友，諗清楚自己係咪真係有能力俾到佢選擇嘅權利，講緊嘅唔係剩係經濟能力咁簡單。唔好剩係為咗自己繁殖下一代嘅慾望或者責任而生育，佢自己想要嘅嘢，你可能呢一世都唔會知道。選擇有小朋友之前，諗吓對你嚟講真正嘅快樂係啲乜，喺呢個社會呢個世界呢一刻活著嘅你快樂嗎？如果你嘅答案係唔快樂，咁請你考慮清楚，諗吓你嘅下一代將來又會快樂嗎？就算你嘅答案係快樂，亦唔代表你嘅下一代將來會同你一樣，因為佢想要嘅快樂可能同你想要嘅完全唔同。

如果你有小朋友，養兒一百歲，長憂九十九，擔心嘅同時唔好限制咗佢嘅想法或者選擇。只要唔係壞事，只要有合理嘅原因，佢想做嘅都應該支持佢；唔好強行灌輸自己個一套俾自己小朋友，更加唔好幫佢諗埋點樣先至係對佢最好，因為你冇可能知道對佢嚟講點樣先至係最好；唔好過份擔心佢會受傷同失敗，只要喺佢需要你扶佢一把嘅時候喺佢身邊，咁就已經足夠。睇到佢真正快樂，將會係你身為父母呢一生最大嘅幸福。

可能有一刻你會覺得含辛茹苦養大個小朋友，自己已經將最好嘅嘢俾哂佢，點解佢都唔聽話唔生性？但做父母嘅咁樣做唔係理所當然咩？何況可能佢想做嘅係一個足球員，但你覺得打籃球先會高就想佢學打籃球，到佢有勇氣同你講自己唔想再打，你就覺得佢唔聽話唔生性。但你又有冇諗過，其實佢想行嘅路同你想佢行嘅路可以好唔同。再者，當初係你乜都冇問過佢就帶佢嚟到呢個世界，真正一世都還唔清個個，可能係你自己。

上面講嘅你唔鍾意聽嘅可以當係廢話，畢竟你可能做多我好幾年甚至幾十人，已經有一套既定嘅生活方式同價值觀。但係有一句嘢係一定啱嘅，有機會嘅多啲陪吓屋企人，上一輩下一代或者另一半都好，就算冇可能完全理解都嘗試盡可能去了解對方。做人唔好剩係用眼睇，用口講，多啲用耳聽，理解吓人哋感受，易地而處；多啲用個腦思考，諗下自己想要嘅、需要嘅，對自己重要嘅又究竟係啲乜。人生匆匆，好多嘢貶下眼就冇。

最後想講嘅係，你自己想點呢，只要唔影響到人，其實就冇乜所謂，但係真係唔好影響到人囉。

作者：鴉艾斯

Ah，I see。中二病想改變世界。文字改變不了的話用影像，影像改變不不了的話用文字，兩者都改變不了的話……對不起了人類，我無能為力。

閱讀後覺得好，請多多讚好及分享～：）