【真人真事】救PHONE20 小時

小城小事 / 最新文章綜覽

 

話說前晚(星期六)七點幾由中環海濱搭的士去尖咀飲,跌左個電話喺的士前座。於是就用朋友電話入find my iphone見到個電話跟住架的士去左土瓜灣,但打極電話都無人聽。估計係因為我個電話較咗震機,又成部黑色,如果跌咗響前座地下,好少乘客會坐前座,而司機揸緊車好難會發現到。

到夜晚返到屋企見到個電話停左喺九龍灣啟晴村好一陣都未走,唔知係個司機食飯定入氣,我老豆就叫我家姐男友揸電單車車我出去睇下揾唔揾到架車,但因為揸緊車又唔係下下check住,一去到睇就顯示已經去左荔枝角,咁樣追黎追去都唔係辦法,於是就身心俱疲咁返屋企沖涼訓覺。

冇咗部電話心掛掛梗係瞓唔着,喺find my iPhone app見到部電話響馬鞍山兜緊,望望下先發覺原來有遺失模式,會lock機同會記錄低佢所在嘅地點,仲會顯示俾佢睇可以打咩電話聯絡你,同埋其他訊息例如:內附裸照,請勿翻看!於是就撳咗遺失模式,然後就瞓覺。

其實個幾星期之前先喺返工嘅時候跌咗部手機響的士,有個好心人執到俾返我,但我覺得我唔會再咁好彩,同埋我對於人性本善呢樣野都非常質疑,其實每個人為咗自己嘅利益去做事我覺得係好自然嘅事,上次遇到一個好人,今次就未必遇到。

晨早七點幾八點醒左再check已經見到佢去匀香港九龍新界(圖),最後停頓點係美孚。咁其實就算知道佢所在嘅地點都無乜可以做,因為如果你搭得車去,架的士隨時會走左。加上我嗰時手上得部用電話卡嘅廢電話,出街無WiFi 用唔到find my iPhone app,唯有等可靠嘅朋友起身,再定時check下個電話位置啦!

去到中午見部電話仲係喺美孚,我估個司機應該落左更,返左屋企訓覺,而我部電話就孤獨咁喺的士等待緊我去救援,而佢就剩返12%電,如果再唔出動,等到佢冇電嘅時候就連佢位置喺邊都唔知!喺呢個時候我終於等到有可靠嘅朋友起身,於是就約埋一齊出美孚揾電話。

去到美孚,發覺個電話location猛咁喺同一條街跳黎跳去,唔理啦!沿住條街,見到的士就去望下前座!好彩搭的士無聊影左張相做ig story,有影到少少架的士前座嘅擺設,就揸住張相,見到的士就過去對下。成條路都唔係好多的士,睇晒都唔係,就去埋附近嘅停車場搵,都搵唔到一架類似嘅的士。

明明黎到附近都搵唔到部電話,真係好唔甘心!但都冇辦法,因為連架的士都搵唔到喺邊!咁就暫時放棄搜索,同朋友去食野同去深水埗睇吓電腦!

行行吓,個電話卡電話終於響!係個的士司機打黎!話朝早落更先見到我個電話,但驚我瞓緊覺,所以就返左屋企瞓醒先搵我。朋友話GPS喺室內會唔穩定,所以就解釋咗點解我哋喺app度見到部電話個位置不停跳黎跳去。

最後終於攞返個電話,我俾咗d茶錢個司機,司機叫我下次去機場打俾佢,同埋介紹朋友d朋友call 佢的士!

兩個星期內,兩次漏咗電話係的士,都攞得返,全靠兩個好心人!睇黎我要重新對人性進行評估,兼且檢視自己袋電話嘅習慣,如果唔係再跌就恐怕冇咁好彩啦!

 

 

作者:何夢

何夢
大學畢業後無業幾年,自稱專業廢青。而家塭到正職,決定疊埋心水全力邁向廢中之路。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 186603
Date: 2018-10-29 17:39:18
Generated at: 2020-03-31 09:24:30
Permalink: https://www.vjmedia.com.hk/articles/2018/10/29/186603/【真人真事】救phone20-小時