10月29日，由Mnet選秀節目《Produce48》脫穎而出嘅12位少女所組成嘅IZ*ONE終於都正式出道，同時代表我家安宥真亦正式出道了！
而第一張mini album《COLOUR*IZ》亦同時面世，一隻碟7首歌，4首新歌，3首係《Produce48》最終回評比唱嘅歌，不過由現時IZ*ONE嘅成員唱返。依家嚟講，Apple music已經有哂全碟，又可以返工放工loop了。
同一日，IZ*ONE都開咗佢哋嘅show con，完完全全唱返哂成隻碟7首歌，仲加料附送節目非常受歡迎嘅《Rumor》，仲有我好鍾意嘅《1000%》。Show con喺YouTube有直播，睇唔到嘅都唔緊要，貼心嘅Mnet仲已經將所有歌upload哂上youtube channel上面，畀大家閒時翻睇又翻睇嘅。
新歌嚟講，我就最鍾意《O’My》，覺得仲好聽過主打嘅《La Vie en Rose》。最搞笑係喺《O’My》嘅live表演段片下面，就有啲癲佬話本田仁美唱左一句「mamamia」好好聽，好得意。呢啲留言係唔止得一個，係成堆。所以，個三位櫻花妹對呢個團嘅刺激作用真係非一般。
但成個show畀我嘅感覺都係感慨嘅多，由其是當佢哋翻唱返兩首最終回評比嘅歌。雖然都係同一首歌，但啲位就換咗人，成個味道就好似唔同咗，忽然就會諗返起個啲曾經同加入IZ*ONE只有一步之遙嘅少女。你哋幾好嗎？仲為出道努力緊嗎？希望你哋真係做到想做嘅事。
點都好，IZ*ONE終於都出道了，作為飯嘅我（只係唯飯，我依家見到張元英chok樣同埋曹柔理嗌歌都係唔開胃），點都要打下歌嘅。主打嘅《La Vie en Rose》同一日都出咗MV。但若果你係nako嘅飯，我只可以好抱歉話你知，nako嘅份量就好似少到無咁，都幾離譜。
最後就講少少唔關事嘅嘢。話說上星期五凌晨，AKB48就出咗佢哋最新單曲《No way man》嘅MV。呢首歌之所以觸目，除咗係因為8位有份入到《Produce48》最後20強嘅日本少女全部有份參與之外，亦係小櫻花、hitomi，同埋nako呢兩年半最後一首參與嘅AKB單曲，之後就會專職IZ*ONE。所以理所當然地，3位一齊企咗最前排。
姑勿論大家聽完首歌覺得點，或者覺得個MV究竟咩玩法，跳個隻舞又做乜事。但起碼滿足咗大家小櫻花做center，同埋見返個啲出唔到道嘅日本少女嘅願望先（但美宥鏡頭真係少得可憐，人哋都畢業喇唉），所以反應都好鬼熱烈。而且唔少日本人驚訝竟然咁多外國人走入黎留言，因為以前AKB啲歌從來都係日本圍內人會留意，完全超乎佢哋想像。計返條數，做洗腳妹但係打開咗國際市場條水，48系蝕唔哂架，所以仲有下次都唔出奇。
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2018年10月30日
