上回講到：Johnny、Ada 於派帖前取消婚禮，『荷葉飯』廿年友情亦隨之灰飛煙滅。
之後，Johnny、Ivy 順理成章地走在一起。
『天也老任海也老 · 唯望此愛愛未老 · 願意今生約定他生再擁抱』
聽著 Johnny、Ivy 婚禮的進場曲，當我以為一對愛對方多過愛自己嘅男女可以幸福快樂地生活下去嘅時候，原來命運真的會因為性格而改變。
婚後，Ivy 盡量都不會出席舊朋友聚會，我曾經問過 Ada：廿年友情，可惜嗎？
Ada：「路係佢哋自己揀嘅，無得話可唔可惜。」
兩年過去，Ivy 囝囝一歲，一天她突然約我出來。
Ivy：「我想離開香港。」
我：「舉家移民？」
Ivy：「Johnny 唔想走。」
我：「你兩個無事吧？」
就係咁，Ivy 帶住囝囝，兩母子毅然飛去澳洲。
又一年過去，有天突然收到 Facebook 一位陌生人「T Leung」新加朋友要求，因為我不知道誰是「T Leung」，所以沒有理會。幾日後，有三位中學同學不約而同搵我，問我識唔識「T Leung」？原來「T Leung」幾日之間 add 咗好多人，佢 Facebook 所有 post 都設定為「公開」，而所有 post 都是衝著 Ivy 而來。
根據「T Leung」Facebook 上所述，Ivy 做咗一連串錯事，傷害了三個男人及兩個小朋友。
（兩個小朋友？不是只得一個囝囝嗎？）
再睇落去，三個男人其中一個應該係 Johnny。
（那另外兩個男人是誰？）
我第一時間搵 Ivy，佢話下個月返香港，到時再傾。之後我再搵 Johnny，佢去咗上海做嘢，兩星期先返香港一次，我再試探問佢有無搵 Ivy，原來囝囝半年前已經返咗香港跟爺爺嫲嫲生活，Ivy 就唔肯返嚟！（究竟你兩個點架？）我都唔知！
兩個月後，Ivy 約我上佢屋企。到達元朗她家，Ivy 抱住一個幾個月大 bb 女，連同 bb 爸爸，看似幸福的一家三口。
我同 Ivy 傾咗好耐，原來當年囝囝出世無耐，Ivy 外家出咗事，一個已婚男同事借咗三百萬比 Ivy 解決問題，Ivy 話當年已經同呢個男同事講清楚，雖然感激佢幫忙，但係無鍾意過佢。與此同時，Ivy 懷疑「T Leung」就係呢個男同事嘅太太。
（唔怪之得 T Leung 其中一個 post 寫過：他傾家蕩產幫你，但你從來沒有好好愛惜他，重視他。可憐他一直沒有放棄你，忍著被欺騙、被背叛的傷口，你卻選擇躲起來，胡胡混混過日子。）
又原來，年幾前 Ivy 同老闆搭上了，珠胎暗結，老闆一直單身，年紀亦唔細，佢唔想放棄個 bb，所以明知 Ivy 有老公，都好想 Ivy 可以將 bb 生落嚟，所以 Ivy 就帶住囝囝飛去澳洲待產。
（記得 T Leung 另外一個 post 寫過：爸爸們，你們願意小朋友以他們的媽媽為榜樣嗎？你們要怎樣向小朋友們解釋媽媽的為人？怎樣告訴小朋友們他們之間的關係？）
我：「成件事 Johnny 知道幾多？」
Ivy：「我過咗澳洲三四個月，就已經話佢知我有咗，所以佢接咗阿仔返香港。」
我：「咁有無諗過之後點？兩個小朋友好無辜呀！」
Ivy：「你幫我同 Johnny 講，無論如何，我愛佢多過愛自己！個仔永遠都係我命根！」
此刻，我心裡面已經鬧緊第十萬次『痴L線』！
Ivy 自細鍾意睇張小嫻，我知佢天生浪漫、多愁善感，佢好喜歡將自己代入林黛玉角色、扮演悲情主角！但原來我係咁唔認識佢！天生浪漫？悲情主角？太美化了吧？佢純粹唔知自己做緊乜！又唔知自己想點！佢口口聲聲話最愛 Johnny，又話最緊張個仔，其實佢連自己都呃埋，佢只愛自己一個！
後記：Ada 都已經搵到佢一生最愛，結咗婚，有一個小朋友。有日約 Ada 食飯，同佢講開 Ivy 件事。。。。。。
我：「Johnny 好慘。」
Ada：「佢都係一個不甘寂寞的人。」
噢！其實在感情世界中，點先算輸？又點為之贏？起初，Ada 好明顯係輸家，但原來望返轉頭，Ada 好肯定係最好彩嗰個。
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2018年10月31日
