人大咗，萬聖節就唔係節日。

如果係幾年前嘅十月三十一號，我一定會喺蘭桂坊出現，或者最基本都搵個有酒飲嘅地方。節日有冇假放係其次，最緊要有理由出去玩，特別係一諗起蘭桂坊有一大班扮鬼扮馬嘅靚女，就算識唔到，去望下再同朋友飲兩杯都唔錯。

而家？我喺屋企諗住寫完依篇文就瞓。

一個人大咗，對好多嘢嘅睇法會唔同。以前嘅我係最緊要有得玩，落去玩到四五點食個早餐先返屋企都係等閒；而家莫講話去到蘭桂坊要排兩個鐘兜個大圈先入到去攰死人，齋係要我沖完個涼再出中環條路已經令我卻步。咁遠，我用嚟瞓多陣唔好？第二日仲要返工啊大佬。

以往我好享受喺唔同嘅酒圍繞之下飲個你死我活，依個瞓死喺度，嗰個就入廁所嘔到七彩，總之出到嚟飲嘢就唔可以有人仲行到直線。不過今時唔同往日啦，而家嘅我醉唔起，更加唔醉得：年少輕狂就話瞓兩三個鐘都冇問題，而家一醉真係怕聽日唔知醒遲大到，然後比老闆照肺。

唔夜得、唔醉得、唔願郁，萬聖節對我嚟講就好似兒童節一樣，唔屬於我個年齡，一啲都唔關我事。你話China出面有個大波鬼妹扮吸血鬼任影唔嬲？Volar好多醉貓春光無限？我想玩啊，不過我都係早啲上床瞓先。好攰，早抖。

作者：毛言地

你有多久沒去找自己的理想？搏殺一天，回到家，倒頭就睡。 無言，只因生存太累。談理想？妄想； 毛言仍言，只因理想，本就是「理應去想」 http://www.facebook.com/MaoYanDe

閱讀後覺得好，請多多讚好及分享～：）