每朝一起身,我都會先嘆一口氣。

 

 

每朝千萬個唔願意噉起身之後,我都會伸個懶腰,然係嘆一口氣,為我又要返份閪工、睇住新聞上啲閪官、同埋晏就食埋哂啲閪嘢嘆氣。

有時會為埋因為瞓晏咗又趕唔切班巴士。

閪工香港處處有,但唔知點解我間工司係閪依方面都仲可以咁出類拔萃。勞工假七日Annual仲要返六Day唔在講,仲有個當你24小時On Call兼要求朝令夕改嘅老闆娘,加埋乜都鍾意扔比我地做嘅隔嚟部門大佬(係啊,我唔知點解佢會叫到我地做嘢),日日一諗起依個人間煉獄,嘆口氣已經係我最好表達心情嘅方法。唔係嚟緊有兩個旅行要去唔方便搵工又大洗費,我應該會再一次裸辭,然後享受一陣瞓到兩點先起身嘅日子。

唔知由幾時開始,我覺得香港新聞已經同閪嘢連成等號。港豬澳大橋又冇流量打個三號波又要封橋但洗咗千尻幾億;班官日日出嚟解釋講啲嘢柒到當香港人係撚樣噉都可以個個月十幾廿萬袋袋平安;樓市跌小小就講到麥當勞買一送一咁抵屌但又唔諗下香港個樓價跌多一半都仲係高到痴線;仲有啲休班警咸濕碩士生無良醫生之類,真係連港聞都想飛咗唔睇,睇下國際同體育新聞就算。

返啲工廠區可以食嘅嘢真係唔多,有時你想健康啲叫啲三低之選?餐牌下面一個東坡肉飯上面一個干炒牛河同福建炒飯,快餐唔係白汁豬牛雞拼腸腿餐蛋嘅飯意就係Show Me Your Love之流,你想搵條菜食下咩?菜遠排骨河一樣唔係健康嘢。唔健康都唔緊要,但當你發現去多幾間餐廳嚟嚟去去都係食嗰幾味嘢,有特色少少嘅又貴又仲肥膩,你好自然唔會對食晏有咩希望。你問我點解唔帶飯?一嚟我唔鍾意,二嚟我想離開下公司,三嚟全公司最閪個同事坐正我對面,而佢又係帶飯。

生活喺香港,日日瞓醒都要面對同樣嘅問題。除咗嘆氣去舒緩下自己嘅不滿,同時提醒自己要接受現實之外,我都唔知仲有咩可以做。

唉。

 

 

作者:毛言地

毛言地
你有多久沒去找自己的理想?搏殺一天,回到家,倒頭就睡。 無言,只因生存太累。談理想?妄想; 毛言仍言,只因理想,本就是「理應去想」 http://www.facebook.com/MaoYanDe

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 186872
Date: 2018-11-06 06:51:35
Generated at: 2021-05-13 18:26:11
Permalink: https://www.vjmedia.com.hk/articles/2018/11/06/186872/每朝一起身,我都會先嘆一口氣。