【純屬虛構】任何仁消失大半日去左邊？

我叫任何仁，我接咗份傳單嚟做

當大家睇到呢段文字嘅時候，我可能已經唔喺度……

（一）

我叫任何仁，一直都係做炒散。人生本嚟冇咩特別，亦冇咩意義，只係一個典型廢青──其實都唔叫青喇，望住個大肚腩，自己都說服唔到自己仲係青。

你問我讀完書做咩唔正正經經搵份工，咪玩啦，香港地得一份工，就係同地產佬打工之嘛。我上無父母，因為一早失散咗；下無妻兒，睇我個樣都知冇女啦。既然冇咩負擔，又使咩搵返牛工，反正人生都係冇意義架啦。我一個人住喺幢殘殘舊舊嘅大廈入面，與一樓一阿姐同孤寡老人為鄰，一時派下傳單、一時扮下米妮老鼠，夠交租夠食夠玩，最緊要就係夠瞓，有咩唔好呢？

今次，我就接到一份傳單job，因為要扮住嘢嚟做，所以特別好pay，因為著住套公仔衫熱架嘛；不過今次有啲唔同，唔使著公仔衫，而係要著一套緊身衣，同埋第一日返工之前要去一去消防局幫下手。反正我個人又冇咩形象，套緊身衣又連頭都包埋，仲要人工高，當然唔放過，咪做囉。

因為要去消防局先，所以我一早未天光就要出門口：你知啦，住得遠，時間難預，你唔會知港鐵今日壞邊區，我就寧願早啲出咗市區先，頂多冇嘢做去消防局坐喺廁房眠一眠啫。點知一出門口，就見到個外賣仔瞓喺地下，嘔晒白泡。正想話佢係唔係玩嘢，隔籬屋阿婆就鬧我：「仲望！救人啦！」正想話嘔晒白泡點人工呼吸時，阿婆就同牛頭馬面跳起舞上嚟，教我點做心外壓；樓下明仔又拎部AED上嚟叫我用嚟救人。

人就救到，我仲送埋佢上救護車添。我嗰時仲諗佢都命不該絕，點解會有牛頭馬面嚟呢？後嚟我就明，佢哋其實係嚟搵我嘅。

（二）

點都好，嗰時我係信心爆棚架。聽住外賣仔係咁大叫「藍色外星人」，我係好開心、好有自信；因為我似乎做咗人生中最有意義嘅一件事。呢個時候，我先注意到，原來今次份傳單job係派消防處「擊活人心」course嘅傳單。我似乎發現咗自己嘅使命，亦發現已經天光，即刻仆出去市區，去消防局集合。好在，今日港鐵係喺車廠入面壞車，冇送額外行車時間，謝天謝地。

嚟到消防局，原來所謂「幫下手」，係要幫手喺消防處個記招度示範下點用滅火筒、點做心外壓，仲唔止我一個藍衣人喺度幫手添。滅火筒我就未用過，心外壓就啱啱用過，熟晒手勢啦。正想上場時，個消防官見到我哋幾個藍衣人，最大粒嗰個一開始好似幾驚奇，之後就黑晒面，不過消防官都笑笑口同我哋打招呼，唔該前唔該後咁。之但係臨開始時，笑笑口嘅消防官就好尷尬咁拎咗條短褲畀我哋著，話費事我哋大抽得滯嚇親記者喎。

記招好順利咁完咗，不過我哋就唔係咁順利喇。我哋要去勻全港九十八區派傳單，一開始仲好地地，頂多就係冇咩人拎傳單啫，派傳單冇人拎我都慣晒。後嚟到咗下晝，人開始多，但係無論去到邊區，都有好多同我哋差唔多樣嘅緊身衣人出現，派好多唔同嘅傳單，除咗少少係轉咗綠色之外，好多都同我哋冇咩分別。因為好多同我哋差唔多樣嘅人同時派傳單，結果我哋啲傳單就更加冇人拎喇，首先唔係個個都拎傳單，加埋人人都以為已經拎過，自然一張都難派。

最大鑊就係，派派下連政黨都派人嚟扮我哋，而且佢仲要唔改顏色，用埋我哋隻藍色，去宣傳佢哋個「人哥」。由「人哥」出嚟開始，我哋就係咁畀警察趕，行到邊都話我阻街，我都講明係幫消防局派緊急救course傳單，點知啲阿sir都係話「阿sir做嘢唔使你教」，好似唔識聽廣東話咁。就係咁，成日流流長，我最多都係派到十幾張。派咁耐傳單，都未試過咁失敗。

（三）

派唔晒，都係要收工。返到屋企，睇下電視，就見到自己上咗電視。咁大個仔都未試過上電視，都未開心完，電話就響嘞，原來係笑笑口嘅消防官打嚟，佢叫我即刻著好晒套藍衫去消防局。講到咁趕，咪去囉。去到之後，佢哋要我抱拳影張相就叫我走。我問佢哋咩事，佢哋都話聽日先講。冇所謂啦，反正聽日都仲要派，咪聽日先講。臨走時我話，無啦啦叫我出嚟，車馬費都畀少少好喎，消防官都話OK，咁佢話有我就放心啦，咁大個消防處唔會走我嘅。

殊不知，第二日一早，消防官竟然打嚟同我講：「你今日唔使嚟喇，冇傳單派喇。」上網一睇，原來話係「消防高層震怒」，仲話我影響佢哋形象！咪玩啦，嗰個造型邊會有人link up到消防呀！算，冇得做咪冇得做，但都要找返條數。點知連出job嗰邊都失埋蹤，死都唔聽電話。冇法啦，唯有又去消防局，睇下仲見唔見得到笑笑口嘅消防官，希望佢會應我啦。

行到消防局門口，我都未行入去，已經有兩個警察，一左一右夾住我，話我涉嫌阻街、遊蕩、阻差辦工、尋釁滋事，要我返差館協助調查。我即刻叫出嚟「咩尋釁滋事呀香港冇呢條……」呢句嘢都未講完，佢哋就一手箍埋嚟，下一秒我就已經喺個臭格度。

（任何人都可以被警察拘捕…）

我咁大個仔，第一次畀人咁困住。望住空蕩蕩嘅囚室，我不禁要問：到底我做錯咗啲咩？我去派個傳單啫，又畀你哋當「人哥」咁趕；同你做完嘢收返啲人工，天經地義，犯咗咩法呢？問下點解有得告我尋釁滋事，使唔使打到我冇晒知覺呀。諗到呢度，條頸都痛痛哋，手腳又有啲痺痺哋。

臭格入面百無聊賴，做乜都唔係。唯一令我好奇嘅，係點解差館啲電腦，線位做緊咁差，條LAN線唔止係冇綁好，仲要飛晒出嚟。正當我想試下伸手拉唔拉到條LAN線，等啲警察可以理下我時。笑笑口嘅消防官又出現，佢帶咗我出差館，仲係咁講唔好意思。一路行，佢一路話「高層已經認可咗你」；我唔理高層點睇吖，我淨係想知傳單條數同啲車馬費係點。佢只係問返我轉頭：「你識唔識玩Facebook架？」

「Facebook？仲有人用架咩？點都好啦阿sir，我條頸真係好痛。」

（本故事純屬虛構）

作者：薰華

塵世中一件無名廢青，除咗偏見同口水就冇嘢多。

閱讀後覺得好，請多多讚好及分享～：）