而家啲所謂經濟學家?

 

 

新聞話,香港有X咁多名經濟學家都聯署支持咩明日大嶼計劃。我睇到報道,真係哈哈大笑多三十聲。

熟悉我既人都知道我經常都係度屌啲非常無用但又日日講空話既經濟學家(NO HARD FEELINGS!)。拿,原則之一,無料既應該屌,而原則之二,有料但係變左老屎忽之後出賣自己既人格既,就更應該屌,根本就咩學科都係,放諸四海皆準既。但經濟學家唔知點解,吹水味梗係特別濃,往往會話俾你知自己只會在乎經濟效益或者係金錢上既效益。其他咩鬼環境影響呀,就一向好少理,甚至話只要你俾夠錢賠償就會合乎經濟學理論。我相信,如果我以以下呢一套既說法去做,我都會義無反顧去支持填海計劃:

首先,我假設填海既成本一定係可以由政府去COVER,而政府唔會有任何風險,引起其他債務上既問題;而我又假設,政府填海出黎既地,公私營發展既比例,係容許有一定數量既地皮係可以透過賣地賣出去;而我再假設,賣地出去當時既價值,係根據一個正常既經濟環境,到時賣地既收入,又一定可以填補到當初填海既成本有餘。而衍生出黎既其他成本,包括機會成本,社會成本,等等,都可以完全被經濟效益抵消。

例如,塊人工島可以令到香港成為全世界首屈一指既經濟體,甚至超越美國,塊人工島成為大灣區既核心之中既核心,係內圍既外圍既內圍入面,竟然可以有一個超級創科中心,入面提供左大量就業機會不特止,市民既收入可以倍數提升,再然後好多住戶都可以安居樂業之類。只要你將呢啲假設不斷推疊,你可以疊到一條港珠澳橋出黎。信唔信?經濟學家依家就係話俾你知,反正我是信了。至於佢地到時仲住唔住係香港?木宰羊啦喂!

林超英話氣候暖化海水上升會浸左個島?我一句KO你:個島假設會自己浮架!

我諗起一個經典既李力持式經濟學人笑話:一條船沉左,乘客係海中浮沉,終於去到一個孤島上面。好多人都無野食,但係到最後竟然發現左一個罐頭。好多唔同學術既乘客都討論緊點樣開到個罐頭但係不得要領。到最後,一個經濟學家舉手,話有解決辦法,大眾聽到,欣喜若狂,佢清一清喉嚨,朗聲道:

我會首先假設依家我地有一個開罐頭刀。。。

我真係恭喜你呀!我真係假設埋你添呀。假設大家都唔駛肚餓,大家都可以做任何仁,激活人心之餘叫一聲即可飛上天。明日大嶼都可以變埋天空之城計劃,然後由飛天豬接載啲人上去,不知幾開心!

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 186941
Date: 2018-11-08 05:46:35
Generated at: 2021-09-19 15:30:33
Permalink: https://www.vjmedia.com.hk/articles/2018/11/08/186941/而家啲所謂經濟學家?