呢排咁啱得咁橋，我聽多左有關結婚或婚宴方面嘅話題，唔知係咪天氣涼返少少就進入擺酒高峯期呢？
話說 Amanda 約我約得好急，佢話有人生重大問題，想有人聽下佢發洩。Amanda 仲約埋個朋友陪佢，但預約當日，朋友比 Amanda 準時到，見朋友有啲尷尬，我就求其搵啲野講。
「你知唔知 Amanda 因為咩事想黎開牌？」我心諗，開牌帶黎旁聽嘅多數都係好姐妹啦，應該知道對方最近煩緊啲咩啩。
「其實我唔知⋯」朋友繼續尷尬，「其實我只係佢舊同事，我今日放假，咁佢想我比個 referral 佢去做 Facial 有折頭⋯⋯」
「原來係咁。」我有啲無奈，一路心諗 Amanda 都仲識 R 折頭兼有心情去做 Facial，所謂人生問題都唔係真係咁嚴重啫。
姍姍來遲嘅 Amanda 黎到之後，開始表達佢對新婚老公嘅不滿。
話說 Amanda 結左婚無幾耐，目前同老公租緊地方住，原本想抽居屋，但係仲未有消息，「但係我而家都諗緊係唔係要同佢行落去。」
個朋友聽到 Amanda 咁講都嚇左一跳，「喂你結婚無耐咋喎，佢出面有女人？」
「唔關事。」Amanda 好似覺得「另一半出面有女人」都唔夠自己呢刻面對嘅問題咁嚴重，「重點係我覺得佢好唔尊重呢段婚姻。」
聽到佢咁講，我都不禁坐返直個人以示「尊重」，講到咁，似乎真係有啲大問題咁樣，唔通個老公家暴佢？定係晚晚出去玩唔理佢感受？
點知。
「對我黎講，結婚，好神聖。」Amanda 用一把好認真、好清澈嘅聲音咁開始講，「我理想嘅婚宴，係得到大家嘅祝福，令大家理解同埋欣賞我地祟高嘅愛情，甚至大家會感動到流淚嘅，先係美好嘅婚宴。」
「……OK。」我略略回應以示我聽緊，因為我好驚 Amanda 覺得我唔尊重佢；不過，我唔知我聽到呢度臉上係咩表情，但係我瞄到佢個朋友臉上已經露出疑似胡＊欣「你無L野呀？」嘅面口。
「我老公佢，居然喺婚宴上面，同佢個兄弟兼 MC，喺台上面搞棟督笑！」Amanda 語氣開始急促，「我唔明，點解要將咁神聖嘅婚禮搞到好似喜劇咁，全部人都笑，連老爺奶奶都喺度笑，我覺得感覺好差，好 ashamed，好唔受尊重！」
「之但係婚禮笑咪好囉，你想搞到個個哭墳咁呀？」佢個朋友忍唔住回應，我聽到佢呢句說話，忍笑忍到胃痛，拿拿聲拎起杯野飲兩啖，分散自己注意力。
頂你，哭墳。我好想認識你呀，朋友，咁鬼幽默嘅。
咁首先開牌出黎，當然 Amanda 老公根本唔知個問題係邊度（其實我都唔知），佢反而覺得結左婚就收心養性，已經諗住之後做住家男。聽到呢個牌面，Amanda 靜左，而佢朋友就同我打個眼色，露出一個「都唔知佢煩乜」嘅表情。
「我同佢真係夾咩？」Amanda 死心不息。
「好老實講，」我不禁苦笑，「每個人對婚宴表達方式都有唔同想法，而家你都結左婚，講真，你估我真係咁鍾意叫人打仔分妻咩！」雖然呢樣野我成日做（唉…），「其實你老公都係想令到個場合開心，係喊定係笑，都可以係表示感動嘅方式，如果你父母喺婚宴上面同你攬住喊到妝都溶哂，一路叫你唔好嫁呀、唔捨得你呀、返黎啦咁樣，真係貪好意頭咩，你問心，係咪先？」
Amanda 個朋友加把嘴，「佢又唔係玩你，又唔係對你唔住，其實你諗太多啫，睇少啲劇啦。」
由於阿朋友講野太啜核，今次我無左反白眼嘅機會，但係 Amanda 總算暫時放低「我地唔夾」嘅念頭。
希望佢唔好拎呢樣野返去同老公嘈啦，如果唔係都幾灰……。
名校老師婚外情的故事
女人就黎三十歲仲係 A0 係咪就叫有問題？
中女不諱言「我有 SP，但我唔會同我老公離婚」
老師的成功要訣：識人、埋堆，攀附權貴；作育英才已經行唔通。
女性客戶開口埋口「我認為」，咁你有無理過對方點諗先？
我以為個客擔心病母健康，原來佢只係想快啲分身家
其實人地會覆你短訊可以係出於禮貌，唔代表人地鍾意你⋯
唔係乜野工作都可以上 JobsDB Apply 嘅，例如 DJ 或者 KOL…
男朋友同你求婚，原因唔係因為佢愛你，而係……
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2018年11月8日
