西角腸B119-暹羅苑泰國餐廳
我好為食，一同食有關就心心眼，之前都去過幾次美食博覽同冬日美食節，但係發覺一年比一年伏，啲嘢又貴又唔好食，所以已經打算唔再去，但係最近又發現葵芳有個美食節，價錢好似親民啲，又未去過，就決定畀多次機會佢！為咗減低中伏嘅機率，我出門口前睇咗幾條片，有KOL介紹邊啲好食邊啲中伏，例如燒蠔（有沙、勁細粒、難食）、漢堡扒（鞋過塊面）、蟹粉小籠包（無蟹粉）等等，諗住避開晒實無死。
去到見到好多檔都係$100/3份，有燒金蠔、燒帶子、牛柳粒、鰻魚等等，份量好少又唔知好唔好食，猶豫咗好耐都係無買，想試玉子燒，但係$40一份實在太貴，個餡仲要只係得啲蟹柳，另外想試空氣梳乎里，又係$40份，但個樣唔靚，望落一啲都唔鬆軟，最後都係揀咗信自己對眼，忍手無買。
超超超超大伏係蟹鉗串($30/4粒)，男友阿Mike一睇到串嘢個樣已經話覺得好假，但係因為我見個KOL話呢個蟹鉗值得一戰，係真蟹肉食到有海水鮮味，所以堅持買，結果係一舊粉，衰過平時食嘅蟹柳，其實我有畀錢，點解可以畀舊粉我食，仲要成三十蚊。第二伏係芋圓鮮草凍($20)，啲芋圓死實實一啲都唔好食，鮮草凍好稀又唔夠凍。
性價比最高係鮑魚螺片花膠($32)，勁多花膠好足料；咸蛋黃魚皮熱狗 ($25)味道幾夾；胡椒餅($15)好重胡椒味但包好厚；榴槤奶凍($20)OK，蔗汁$20/2支係抵，但我見佢原價竟然係賣緊$30支，仲要勁細支；蚵仔煎($30)，其實蠔仔都算多又唔腥，只係個人唔鍾意咁濕同一pat嘅感覺；牛奶豬串燒同豬肉丸($20)，串燒味道係OK但粒豬肉丸未熟。總括嚟講，由於有做功課，已經避開咗好多伏嘢，但變咗無乜好食，而且啲嘢食無乜特別，唔值呢個價。
講完嘢食講場地，可能因為係美食展嘅最後一日，真係逼到阿媽都唔認得，呢個其實預咗，但係埸地出奇地少高枱，一係就放正喺兩個大垃圾筒隔離，一路食一路有人喺你隔離掉垃圾，我見到有人甚至喺垃圾筒頂（咁啱有個架囉）度食，好陰公。無枱唔係唔得，但有啲嘢食用紙碟，其實真係好辣手，要放低食。有時望到啲枱畀人霸咗但只係用嚟放一個水樽真係火到嚟。
另一個原因唔想再去係因為香港人真係好燥底同無公德心，當日好好太陽，人又多，位又窄，其實真係好熱，同埋好多時都塞咗喺度郁唔到，然後不時都會畀人推撞或者係畀人鬧，例如：「唔行就唔好阻住晒啦！」明明前面塞死晒郁唔到，你估我想企喺度曬太陽？一係就一手推開你話：「頂！咁多人點行！」有好多一家大細仲帶埋BB車嚟，我真係唔知佢哋點行到。
嘢食、場地、整個美食展經驗都係唔好，貼錢買難受，不可一，不可再。
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2018年11月9日
