老鬼老鬼,己所不欲must施於人。

 

 

大學,係知識既殿堂,係文化既起源地。

但問題絕少出現係課堂之上,可能係填鴨式教育已經入侵大學。

取之代之係課堂之後,CON會場地,大學生展現出對問題既飢渴,會將課堂應該要問既問題一次過係CON會到問。

當然,問題都唔再關上堂事,而係關佢地一直放係第一位既學會事。

特別係老鬼,可能佢地係職場上冇得問,只能做,所以佢地極度渴望一個可以問問題既平台,舒發心中既苦悶。

面對呢個機會,佢地展現出大學生對知識既追求,對答案既執著,令人為之讚嘆。

「解釋下點解要搞呢個活動。」「呢個活動有咩意義。」「有冇人會參加呢個活動。」「點解搞呢個活動唔搞其他活動。」

「有冇格過價。」「格左幾多間價。」「點解格得幾間咁小。」「點解唔去其他區格埋價。」「呢間唔係最平,但我唔會話你知邊間最平,你自己再去格下價。」

「莊員自我介紹一下。」「莊員係咩血型同埋星座,會唔會唔夾。」「講下自己gpa幾多。」「講下自己最中意同埋最討厭邊位莊員。」「邊有莊員最大機會freeride。」「邊位莊員最大機會quit莊。」

「有冇人住hall。」「會唔會掛住hall life唔做莊務。」「冇住hall既會唔會捱唔到通宵。」

老鬼啊老鬼,問題天天都多,無論你點樣答,佢地都有方法追問落去,仿似為問而問,番黎就為左刷存在感。

只要新莊唔識答問題,老鬼就會扮出一副上司樣,好似袋錢入你袋咁,挪揄一輪後仲要新莊講聲多謝。

「喂喂喂,我地老鬼特登抽時間番黎教你班新人,係袋錢入你袋,麻煩比番上莊應有既態度出黎虛心受教。」

完左CON會後,一眾老鬼去大牌檔邊隊啤邊講下社會種種不公,番工係何其辛酸。

「今日個老屎忽又黎料,成日借頭借路話我廢。大佬啊,邊個一出世就識得做野,我都好努力學緊,條友硬係睇我唔順眼,係都要針對我。」阿強將杯中啤酒一飲而盡。

「我又何嘗唔係。腦細?佢個腦就真係細,成日答埋d白痴問題,要我解釋十萬次比佢聽,我屌!我點知咁多姐,上一手點做我咪跟住做,又無人同我講點解。」阿輝反了反白眼。

「出黎做野,比人屌就一定。但我上司先至係極品,成日話我錯,又唔講邊到錯,我明我明,做細既係要有能力處理問題,不過果d問題根本唔成問題,只係雞強挑骨頭,新入職教都唔都,我點識咁多野。」阿然為莊員倒了數杯啤酒。

只有阿雄,一言不發,望著杯中既啤酒由凍變暖,連一啖飯都冇食過。

「喂,阿雄做咩粒聲唔出,平時你好多野講,你係阿P黎架!冇左你唔掂。」阿強拍拍阿雄既膊頭。

「畢左業半年有多,次次見工都遇著d閪到無倫既HR,問埋d低能問題,又問我點解咁低gpa,又問我點解去咁耐grad trip,我心諗,呢d同我工作能力有咩關係?點解d人唔可以用下個腦去問問題。」

「總之呢,天下老細一樣閪,飲杯啦兄弟,明天會更好既。」四人舉起酒杯,互相觸碰。

CON會進行左第一日,除左上莊無窮無盡既實務問題,仲要防範突襲老鬼既無厘頭問題,佢地既壓力唔比呢班職場新鮮人小。

如果你係一個老鬼,希望你可以將心比心,回想起自己上莊既時候,會唔會遇到不公平既對待?

如果覺得心有不甘,就唔應該延續呢種不公,更唔應該要其他人承受呢種不公。

老鬼,就好似職場上既前輩,可以幫到你,同時可以害你。

人人都話大學係社會既縮影,雖然大家無能力打破社會不公,但至少,我地可以嘗試打破上莊文化既種種不公。

仲有仲有,嘗試將自己對知識既執著,對問題既渴望放回正確既位置,做番一個合格既大學生。

 

 

作者:筆知所謂

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 187123
Date: 2018-11-13 06:24:06
Generated at: 2021-12-09 06:06:08
Permalink: https://www.vjmedia.com.hk/articles/2018/11/13/187123/老鬼老鬼,己所不欲must施於人。