1%的幻覺，令好多人係股票輸錢

市淡，無乜好講，除非沽緊。與其睇住報價機，不如等筆者分享下一些個人睇法。以前筆者同好多人一樣，會幻想自己買中下一個騰訊然後長揸等發達，但後來計一計數就知有問題。全香港二千多隻股票，有幾多隻騰訊？一隻。 換句話說，買中一隻可以長揸既倍升股騰訊，機會率係0.05%。0.05%，只可以講係易中過六合彩。

當然有人又會舉港燈、煤氣、中電、維他奶等等其他例子做反例。但這些股票，佔整體可買股票既%係幾多？有無1% — 即大約二十隻股票？ 就當你有吧（我簡單睇過係無二十隻，但就算有三十隻，都改變不了長揸倍升股只佔整體股票好小數目之事實），散戶何得何能，可以在茫茫股海中選中那1%長揸倍升股？

筆者認為，誤以為自己可以買中下一隻騰訊，或者能夠選到那1%的長揸倍升股，係大部份散戶都無辨法在股票市場賺錢既主要原因。正因為散戶以為自己手上股票，隻隻都係那1%，於是就用溝淡、平均投資等表面正確但實際錯誤的操作手法。因為你手上揸既，有99%機會不是倍升股。好彩的話，可能係中移動、中人壽、匯豐等波幅橫行，本金仍在。唔好彩的話，就係聯想、利豐、Esprit等高台跳水，身家跟住縮水。

再用恆指做例子。過去十年計，恆指的每年回報大約是4%左右。即係話五十隻恆指成份股，當中有一隻叫騰訊的每年升超過4%，就有其他成份股的回報低於4%，甚至係負回報，例如剛剛被剔出的中國銀河證券(06881)就係一例，對上一年回報係負40%。 如果你以為中國銀河證券係下一隻騰訊，不斷平均投資法溝淡，甚至如一些坊間「投資專家」教落一注獨贏，資金只買一、兩隻股票，你既身家差不多無左一半。

認清自己有1%的幻覺，係散戶能夠在股票市場贏錢既第一步。

【專題：產經輔仁】

作者：六子山

閱讀後覺得好，請多多讚好及分享～：）