領養邁仔之前，不論貓狗鼠兔人，我一概冷漠處之，無情無感。偶有誘畜虐殺新聞，我甚至覺得暴徒出手清剿並非壞事，更不失為某種替天行道。同床靜默相對，房門打開由得佢自出自入，甚至摩娑貓身，感知佢胸腹肋骨嘅起伏，都係我從來冇預期會降臨喺我人生之中嘅癡妄行徑。而領養邁仔之後，我雖性情有變，但對佢嘅同類以至其他常見寵物其實仍然抗拒，於是我清楚認知到，移情作用只會喺可愛物靈之間流動同擴散，絕非物種，而我內心之中嘅可愛門檻，明顯異於普遍水平，陳義過高。