如何搞船P

 

 

本文是心得分享,也許有伏,不要太認真!

 

訂定一個好日子

每次有人問我:「我搞船P,你join唔join先?」但係又未定日子,我都會好無奈。因為我真係答佢唔到,唔係唔畀面你,而係你冇期,我點知自己去唔去到?你最少定個日期先問人啦。

要搞活動就要有日期,訂定一個好日子,係一個船P成功嘅第一步。一般而言,船P係一個全日活動,早上上船,中午玩水,黃昏回程。玩得開心者,晚上仲會留喺西貢,食埋海鮮先走。除非你有快艇,否則冇可能中途加入,或提早離開。所以,要揀一日大部分人全日都得閒嘅,先可以多啲人嚟。星期六會係一個比較好嘅日子,一來大部分人唔使返工可以去,二來第二日都仲係假期,玩完可以休息下。如果你嘅朋友係上班族,你仲夠膽揀星期一至五,要預咗少人參加。

或者你會話:「我怕我揀嗰日冇人得閒呀嘛,咪問定先囉。」咁我建議你問得仔細啲,提供三至五個日期出嚟,畀朋友報名,再要最多人嗰日,就搞掂啦。

 

搵船家報價

搞船P當然要有船,如果你有遊艇,恐怕你唔適合睇呢篇文,因為筆者係一名窮書生,見識比較少,冇上私家遊艇玩船P嘅經驗,我嘅分享幫唔到你,嗚嗚。但如果你冇遊艇,就要搵個船家租船。

要搵船家好易,Google、Facebook、Instagram搜尋「船P」,已經有大量資料同相片。揀到想要嘅船之後,要聯絡船家查詢,一來問佢有冇期,二來要問多一次價錢,因為你喺網上見到個價,可能只係包架船同食物,如果想玩香蕉船、飛毯或獨角獸水泡等,或者要另外加錢。你要知道實際嘅價錢,先可以格價,同預每位收費。記住,如果架船唔包飲品,要預每人收多$50買飲品,要買酒水就再貴啲。

真真正正揀啱後,就同船家約定日期,佢通常會要你畀一半訂金,而且要喺幾日內畀到,先可以確定預約。呢個時候,千祈唔好拎自己錢畀訂金住,除非你唔在意錢啦。你要立即做埋以下兩步,先可以畀訂金。

 

搵40位信得過嘅參加者

當你有齊日子、船同價錢後,就可以正式約人啦。呢一步係最重要嘅一步,因為有人夾錢先有船,有船先有船P!

第一次搞船P,宜以小型派對為主,20人左右就可以。千祈唔好預50人,book隻大船,再畀好多訂金。須知道,唔係人人都咁守信用,答應咗你去就真係去的,呢個世界上有好多仆街,鍾意信口開河,話帶20條女嚟,最尾佢自己都唔去。呢啲人係唔會care你有冇蝕錢,只會care自己有冇畀錢。如果你一早訂咗50人,有班仆街唔嚟又冇畀錢,大部分船家係唔會收返你平啲的,你一係就叫所有出席者夾多啲,一係就自己畀埋缺席者嗰份,總之要超支。

所以,要搵信得過嘅參加者,降低以上風險。可能你會問:「又話20人左右就可以,咁你又要人搵40人?」做搞手就係咁慘,永遠要作最壞打算。就算你信得過所有人,都要預一半人放飛機。因此,要搞20人派對,就要叫40人。

「咁如果40人都去到呢?」咁我恭喜你先,你嘅朋友好可靠。放心,一個船P要加人頭唔難,早幾日同船家講聲,佢地最多預備多啲嘢食,加你少少人頭費唧。如果船家話應付唔到咁多人,可以轉另一架船,或者以先入數先參加嘅方式限定人數。

 

叫所有朋友畀錢

確定出席者後,叫佢地盡快入數畀你,至少一半人畀咗錢,真係確定搞得成,你先好畀訂金。如果落訂期限之前,連一半錢都收唔到,你需要慎重考慮下班友仔會唔會走數,個船P仲成唔成功。而家有ATM、網上理財、PayMe咁多畀錢方式,仲要咁方便,佢唔係咁都要搞成個禮拜先畀到你呀?當然,我唔係要你奪命狂呼咁催人畀錢,你可以拎自己錢落住訂先嘅。但係,如果好多人拖數,可能你要諗定後補方案啦。

收齊數,落埋訂,船P準備好!

 

送出溫馨提示

所有人畀晒錢後,就可以等待船P之日嘅來臨啦。期間,你可以寫定溫馨提示,WhatsApp畀參加者,提佢地集合日期、時間同地點,講明遲到冇得上船,努力令大家準時出海。

另外,飲食方面,大部分船家只提供食物同雪櫃,唔會提供飲品,貼心嘅你可以約定五、六位單身男女,早一小時到西貢,一齊食早餐、買飲品,畀佢地互相認識下。早起的鳥兒有蟲吃,早到的男孩有女溝。可能可以撮合到情侶都唔定呢。

 

上船

到咗嗰日,你買定嘢飲,畀埋尾數,就可以同一班朋友上船,啟程出海啦,祝大家玩得開心!!!

 

作者:霏子

霏子
Fayly .Party Host .不務正業、自甘墮落 .香港大學主修文學及文化研究

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 187225
Date: 2018-11-16 06:43:31
Generated at: 2020-04-07 16:26:10
Permalink: https://www.vjmedia.com.hk/articles/2018/11/16/187225/如何搞船p