我識人係「走塑」大師

小城小事 / 最新文章綜覽

 

近排咪好興走塑嘅,我識人對「走塑」好有心得。條女爭我成兩皮野,拖左成年幾都未還,走數大師呀哈哈哈哈哈……

 

(唔好意思呀呃咗你入黎,呢篇同環保完全無關,但既然你都撳左入黎就睇埋落去啦哈哈)

 

我以前喺英國讀書時有個香港housemate叫kelly,屋企好有錢,住九龍城兩層大屋,要乜有乜咁。呢個富家女嘅嗜好係賭錢,佢喺英國除左走堂行街shopping之外就係去賭場。

「喂Eva你陪我去G*呀。」
「唔喇,我唔賭架。」
「見識下嘛,去飲下免費熱朱都好嘛」
「唔……好啦。」
因為我好鐘意熱朱古力,所以就跟左佢落去。之後都跟過佢去幾次,因為G嘅熱朱確係唔錯,唔洗錢之餘仲好過sta*buc*s。

叫我落去陪你冇乜所謂,但佢之後就開始問我借錢喇,話屋企人未過錢俾自己。當初我係唔願意嘅,無理由你叫我借就借架嘛,我自己又唔係又錢。但由於我借完俾佢通常佢都會準時還,我就覺得唔緊要啦。加上英磅係計大概十一二算(當時),變左五百幾港紙就只係五十英鎊,有種銀碼唔大嘅錯覺。

而家諗返起,佢識左我一個月後就又煮飯我食又主動教我化妝咁,真係好有陰謀。

Kelly大我一年,所以早我一年畢業,早我一年返香港。喺佢走前嘅幾個月,佢以要交屋租為由又問我借左幾次錢,價目由三百鎊到六百鎊不等。點解冇錢?原因不外乎話自己大洗左屋企人又未過錢俾佢……我喺睇返transaction先發現佢借埋借埋爭左我萬六七港紙。我影低個transaction record俾佢,佢仲講左句「唉呀 你唔記得你上次有500係cash俾我架咩?對錢銀要上心啲精明啲呀,唔係好易俾人呃架!」唉呀,真係防人之心不可無。

佢臨離開英國時言之鑿鑿咁話自己返香港就會還錢俾我,話還足十二算添。結果呢,返到香港就話自己信用卡俾父母cut左,財政上父母並無任何資助,只靠自己份萬一蚊嘅糧養自己。佢話每個月還4k,咁四個幾月就會還晒。

Okay,咁佢講到咁就睇下點囉。第一個月佢有還,跟住就冇左聲氣。於是我就問下啦,佢話過多五星期還。Okay。九星期過左,佢話佢兩星期前用左成8k剝智慧齒冇晒錢。9-5=4,唔啱數喎呀姐,你應該喺剝牙前就還左4k俾我啦。佢話好對唔住,話下年年頭一次過買晒俾我喎,即係又拖啦。

點解…明明係你爭我錢,點解要我追住你問,氹細路咁氹叫你還錢……真係有心還嘅一早還左,做part time,問屋企人借……乜都得啦。我唔知喺好久嘅將來佢會唔會還晒啲錢俾我,我只想講句,還得到先好借呀仆乖!

 

*G = Grosvenor,英國好多城市都有嘅賭場,因為個logo係個G字同個名有啲難叫故簡稱為G。

 

作者:柚希

柚希
從劣食國度回流返港嘅天然呆痴女,興趣係昅仔。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 187325
Date: 2018-11-20 05:05:53
Generated at: 2020-07-04 01:59:10
Permalink: https://www.vjmedia.com.hk/articles/2018/11/20/187325/我識人係「走塑」大師