你班人唔好以為女人大波就好爽

小城小事 / 最新文章綜覽

 

 

「唉!喺香港做女人真係好,有塊西就唔使做,俾人插下就有樓住。好似你咁大波,求其露條事業線出嚟,都大把男人爭住埋單啦。大波妹真係冇嘢好愁,大波妹好嘢!」我眼前呢位飲醉酒、前日表白失敗嘅男士攤喺梳化上,向有西冇樓、單身多年嘅我舉杯祝賀。我望住佢,只有苦笑。我知,我知佢只係酒後鳩噏,但我都係認真咗。

我想講,大波女都有佢地嘅煩惱,唔係十全十美的。

 

冇得買靚bra

喺香港嚟講,出名嘅內衣品牌有Victoria’s Secret、6IXTY8IGHT、bla bla bra等,佢地嘅bra款式可愛,深受少女歡迎。遺憾嘅係,佢地只提供D Cup或以下嘅bra,入面的墊仲厚到仆街,個胸大少少都塞唔落。如果你係D Cup以上,淨返嘅選擇係少之又少。以筆者嘅觀察,只有une nana cool同PEACH JOHN 提供D Cup以上嘅bra,仲要係比較靚嘅。不過,有啲款大波著都唔會好睇,因為佢地嘅設計本身係小巧可愛,放大咗會變到好老套。碎花bra就係一個好例子,放大咗只係似床單bra。

筆者初中時,呢兩個品牌仲未登陸香港,咁我點好?係啦,我就只有啲肉色阿婆bra選擇啦。喺更衣室換衫仲成日俾人笑阿婆,冇啲品味𠻹。

 

著衫唔靚似奶媽

堂前燕嘅《唔通波大著衫會柒啲架?》話過,平胸女鍾意以「平胸著衫fashion啲」去安慰自己,平胸都好正。咁佢地又錯唔晒喎,有啲衫真係平胸先著得靚,大波著落去就好柒,例如鬆身衫。大波女同鬆身衫可以話係冇乜緣份,因為佢地個胸架起咗件衫,下身嘅線條會冇晒,咩幼腰、美臀都show唔到出嚟,著完只係一名大媽。但係,平胸女的確冇呢一個煩惱,佢地著起鬆身衫,就會顯得好有骨感、好輕盈。

筆者著過和服,唔係一般浴衣,係好傳統入面包好多層嗰隻,屌你本身以為自己一定好靚,點知最後出嚟,下身包到同個胸同一水平,成個水桶咁,同個奶媽冇分別,真係好失望。

 

做運動辛苦又尷尬

大波女做運動辛苦,仲好尷尬𠻹。大波女心口前有兩團肉,呢兩團肉唔係平均地分散喺身上,而係集中地生喺一個位置,獨立地喺身上凸出。大波女做運動時,只要涉及跑步,都會好辛苦,因為佢地每跑一下,個胸就會上下上下咁擺動,好鬼辛苦。就算著sport bra,問題依然存在,只係冇咁嚴重。仲要香港好少店有提供XL以上嘅sport bra,大波妹著L都係好辛苦㗎。

不過跑步辛苦,又算得啲咩呀,尷尬先係問題呀嘛。每次你跑步,身邊啲朋友一係笑你「big波蕩漾」,一係就求你唔好跑,唔好玷污佢地嘅眼睛,搞到你做次運動都要預咗俾人笑咁。

筆者中五嗰年,班制接力賽規定每班最少出一個女同學,筆者作為班會職員,俾全班推咗出去跑。到跑嗰一日,有班男同學竟然喺終點等我,話咩雖然我地班速度上輸咗但視覺上贏晒、彈下彈下好好睇、比賽嘅可觀性好高等等,都唔知黑面走人好定多謝支持好,搞到我下年要一早搵另一位女同學認投。

 

受到冷嘲熱諷

有次,筆者見到一位大波女跑去追巴士,我隔離位姨姨竟然同人講:「嘩,你望下個死姣婆,個胸彈下彈下咁,幾咁核突。」嘩屌,我即刻o撚晒,呢位姨姨係憑乜嘢,可以一下斷定位大波女係死姣婆呢?就憑佢個胸彈下彈下?人地想㗎?定你要人揸住個胸嚟跑?我真係唔明白。

相信好多大波女都試過,因為個胸而受到冷嘲熱諷,俾人話前凸後凸唔知搏乜、一定有裝假狗、著埋啲緊身衫發姣等等,更難聽、更無理嘅說話都有。但係,其實班人有冇諗過,個胸生得大,係控制唔到㗎呢?同一件衫,平胸女著可能冇乜嘢,但大波女著會爆啲、多咗條事業線,就會俾人話揀啲淫賤衫嚟著,擺明搏屌。唉,有時都真係好無辜。

筆者好少會提起自己咩cup,但女同學問起,我又唔會唔答嘅。有次喺更衣室,有位女同學見我轉咗另一款阿婆bra,問我係咪升咗cup,我回答:「呃,都係嘅。」隔離條女聽到,即刻起晒鋼,好大聲咁話:「講真,你對波越大,只會顯得你越肥囉,著衫咪又係唔好睇。」我嗰下又係o撚咗,咁小姐你想我點呢?去割胸?定認輸話係呀係呀我係死肥婆?當時真係畀唔到反應。

 

唔敢呻大波之苦

寫呢篇文之前,我已經明白,如果有「筆者都係曲線曬自己好大波」、「此文絕粹炫耀」等留言,係十分正常的。因為,大波女只要呻一兩句大波點點點,就好容易會俾人話:「你都係想俾人知你大波喞。」其實,好多事都係相對嘅,平胸俾人笑洗衫板,大波都可以俾人笑奶媽,大家都係慘。但點解大波女一話自己慘,就要俾人話曲線曬命?我地連呻下嘅機會都冇?

筆者中二開始,就絕少提起自己大波嘅苦惱,除非對方係十分熟悉、毫不介意嘅朋友,否則,我係唔敢講大波是辛苦的。因為咁好易俾人話你虛偽,或者以為大波就大晒。同埋正常情況下,你都唔會成日同人提起你大波啦。但係呢,我啱啱升中二時,就真係不知天高地厚啦,人地問起我大波會唔會好麻煩,我真係話揀bra好麻煩。隔離條女一聽到就話啦:「得啦得啦,知你大波買唔到bra啦,咁叻叻咪度身訂造囉,藉口多多。你以為大波好好呀?唔好kai啦,身材呢啲適中咪得囉,你咁大俾人笑你肥婆咋。」

我聽到真係嬲到震,即刻當住全班屌柒佢:「收皮啦飛機場,我係買唔到bra呀,好過你唔使買bra著兒童背心就得啦死柒頭。」再順手喺書包拎支無比滴畀佢:「搽下你心口前嗰兩撻蚊赧啦。」最後頭也不回地離開。

講笑,呢啲全部都係我嘅幻想。事實係我聽到真係嬲到震,但係企喺原地唔敢還口,最後條女頭也不回地離開。不過,呢啲弱智嘢主要發生喺中學時代,升到大學,大家成熟咗,就冇咁幼稚啦。

其實,大波都有好處嘅。去到呢一刻,筆者都好感謝家母生多兩舊肉畀我,等我嘅身材有曲線可言。呢一篇文,並唔係要話大波好慘,大家快啲可憐下大波女,只係想講,大波都有唔好嘅地方,大家互相體諒,輕鬆笑下啦,哈哈。

至於嗰位男士,我冇屌鳩佢,再留佢喺酒吧自生自滅。我請佢嘅兄弟送佢返屋企,臨走前再話佢知:「係呀,大波都好開心㗎,哈哈。」

 

作者:霏子

霏子
Fayly .Party Host .不務正業、自甘墮落 .香港大學主修文學及文化研究

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 187347
Date: 2018-11-20 05:59:25
Generated at: 2020-02-21 23:32:11
Permalink: https://www.vjmedia.com.hk/articles/2018/11/20/187347/你班人唔好以為女人大波就好爽