最好嘅朋友，可以叫做「閨蜜」，通常都係已經識咗好多年，非常熟悉佢嘅喜好、個性，甚至知佢咩情況會鬧情緒，平時有戲想睇有餐廳想試你都會搵佢，喺佢面前你可以做返自己，唔開心又可以同佢呻，開心亦可以同佢分享，你喊到豬頭嗰咁款都只係得佢見過，喺你心目中，佢就係「特別」嗰一位，然後好自然你就以為你喺佢心目中都係「特別」嘅存在。
人大咗，識嘅人都多咗，圈子擴闊咗，除咗小學、中學同大學同學，你仲會有一堆舊同事，或者係一堆朋友嘅朋友，一齊玩嘅時候會好開心，但講到傾心事，通常都係搵返「閨蜜」。話說我其中一個「閨蜜」叫阿花，有次成大班朋友出嚟食飯，其中一個朋友事前whatsapp問我知唔知阿花已經買咗機票，幾日後就會飛去澳洲working holiday，Holy！咁大件事佢竟然完全無同我講過，我乜都唔知，然後成餐飯我都一直等佢講，但結果都係無，走嗰陣我終於忍唔住問佢。
「你係咪有啲嘢未同我講？」我說。
「額…其實我已經買咗機票去…澳洲…幾日後飛。」阿花說。
「點解咁大件事我唔問你你都唔講？」我說。
「額…我唔知點開口。」阿花說。
「咁你又同XX講？」我說。
「我都唔記得咗我原來同咗佢講。」阿花說。
當時我真係又嬲又失望，就走咗返屋企，無再同佢哋去下場飲嘢，到咗夜深，我愈諗愈唔開心，當你以為你係朋友眼中特別嘅一位，但突然發現你原來甚麼都不是嘅時候真係會好hurt，不被重視嘅感覺好難受，我仲好唔爭氣咁流咗滴眼淚，然後我就whatsapp同阿花講咗我嘅感受，佢亦同我say咗sorry，可謂大團圓結局，但自從嗰次之後，我就明白到付出愈多，愈容易受傷，歌都有得唱啦，真係「情難自禁我卻其實屬於極度容易受傷的女人」，原來女人唔係淨係會畀仔hurt，仲會畀女hurt。
而家我對「閨蜜」們一樣係咁好，都會傾心事，有事一定會幫忙，只係開始學識咗唔好每件事都太上心，放過自己，放過人哋，做人最緊要開心，人哋亦唔係事事都需要同我報告，而且「閨蜜」都會有拍拖嘅一日，唔通到時又走去呷人咃男朋友嘅醋咩。無錯雖然而家係少咗聯絡，但我相信咁多年嘅感情係唔會變。
p.s. 換轉係男人，絕對唔會咁care呢啲咁嘅小事，至多用粗口鬧幾句就算，有時都幾羨慕男人間嘅友情。
我去到2021年先唔再睇TVB——正向聯想 (Positive Association)
香港濕熱世界第一！？談散熱和濕度的關係
【職業安全】英國警花分享：防刺背心唔係咁著. . .
【遊戲評測】《血咒之城：暗夜儀式》新生惡魔城 四年等待完全值得
分手咪分手囉，三口六面講清楚好難咩？
薛定諤人生最尷尬的恥笑——薛定諤的貓實驗
2018年11月21日
