組爸不要畢業好不好?

小城小事 / 最新文章綜覽

 

「Hi,你一定係阿詩啦,我係你組爸阿廷呀!你跟我過嚟呀!」oday嗰日,一位男同學走近阿詩,向佢打招呼。

「吓?點解你會知嘅?」阿詩慌失失咁跟住阿廷行。

「嘿嘿,我有stalk你Facebook㗎嘛。」阿廷一路行一路講。

「吓你點搵到我——」阿詩追問。

「你嘅電話號碼,」阿廷回頭,拎部手提電話出嚟,加埋阿詩Facebook:「我add咗你啦,快啲accept我啦,女!」

「哦⋯⋯」阿詩照做,然後跟住阿廷,去到佢地組嘅位置。

就係咁,阿詩認識咗佢人生中最重要嘅組爸啦。

阿詩係一個內向嘅靚妹,入咗大學之後,佢只係諗住乖乖讀書,快快脆畢業,再出嚟搵份工做。住hall、上莊、拍拖,佢從來冇諗過。而ocamp呢?喺OC嘅半推半就之下,佢都有參加嘅。

估唔到一個ocamp,就反轉咗佢預期嘅U life。

三日兩夜嘅ocamp嚟到,阿廷十分照顧一班組仔女,帶領佢地投入活動。一開始玩mass game,阿詩一啲都唔主動,陪下跑、打下氣、食下花生算,完全應酬mode。去到city hunt,佢嗰組搏盡無悔,全程喪跑。回程時,攰到冇力嘅阿詩只好行返去。呢個時候,跑第一嘅阿廷叫其他仔女行先,佢跑回頭搵阿詩。

「女,頂住呀,就返到去㗎啦!嚟!爸爸陪你!」阿廷一下子拉住阿詩隻手,拖住佢跑。

「呃——」阿詩嚇咗一嚇,一秒後先清醒過嚟,面都紅晒咁:「知道,爸爸!」跟住好開心咁拖住阿廷跑,直到終點站。

「點呀女?」等待其他組返嚟時,阿廷拎咗支水畀阿詩:「對唔住呀啱啱chur你跑,係咪好辛苦?哈哈!」

「唔係呀,」阿詩極力掩飾自己嘅興奮:「好好玩!」

跑完city hunt之後,阿詩嘅表現一百八十度轉變,佢好努力咁玩晒成個ocamp。大合照時,佢唔再企埋一邊,而係走近中間,企喺阿廷附近。最後一晚跳campfire,阿廷企喺佢對面,佢都跳得非常落力。或者,呢啲就係ocamp嘅成長啦。

好明顯,阿詩已經中咗招,鍾意咗組爸阿廷。

阿詩係一個含蓄、慢熱嘅人,佢唔會直接地表白,只會婉轉地迷戀。於是,佢用自己嘅方式,默默地追逐阿廷。阿廷係院莊嘅PR,所以佢走去上院莊,仲要做PR,做阿廷嘅正下下莊;阿廷係Hall Six嘅current,所以佢reg Hall Six,同阿廷多啲機會見面;阿廷sem two去英國exchange,所以佢報exchange去英國,可以有藉口搵阿廷問嘢。阿詩一直冇表白,佢只係跟住阿廷,已經好開心。

可惜,美好嘅時光係短暫嘅。阿詩入嚟嗰年,阿廷已經year three。阿詩year three嘅今日,阿廷正式畢業啦。

阿廷畢業嗰日,阿詩買咗一個畢業公仔畀佢,係《鋼之鍊金術師》入面嘅艾爾凡斯.艾力克——阿廷最鍾意嘅卡通人物。阿詩記得,阿廷話過艾爾凡斯份人善良得嚟又戇鳩鳩咁,好得人鍾意。於是佢千方百計咁買咗隻正版公仔,加埋畢業袍,繡埋阿廷個名送畀佢。

「爸爸,畢業快樂。」熱鬧嘅AC3樓梯前,阿詩送上畢業公仔,並同阿廷合照。

「嘩!阿女!多謝呀⋯⋯」阿廷收到突如其來嘅禮物,嚇咗一大跳:「呢個堅嘢嚟㗎喎⋯⋯你做乜嘥咁多錢呀!」

「爸爸你鍾意呀嘛!」

「多謝你呀⋯⋯爸爸真係冇諗過你會送嘢畀我⋯⋯多謝⋯⋯」阿廷嚇到唔知講咩好。

「唔使客氣⋯⋯」阿詩知道機會已經得返呢一次,佢鼓起勇氣:「其實——我都好多謝爸爸你畀咗一個咁開心嘅大學生活我!如果、如果你可以唔畢業就好啦!」

阿廷呆咗一陣,然後笑咗。佢摸一摸阿詩個頭:「傻女,我都好開心有你呢一個組女!下年去英國exchange玩得開心啲,要寄postcard畀我!」

一陣風吹過,阿廷嘅笑容依然係咁迷人。

「喂阿廷!影莊相呀!爭你一個!」遠方,阿廷嘅莊員呼喚佢。

「得得!」阿廷向莊員大嗌,再回頭同阿詩講:「多謝你呀女!我去影相先!再傾!」

「爸爸——」嗰四個字,阿詩未講出口,阿廷已經走咗,阿詩只可以望住佢嘅身影,消失係人群之中。

組爸的大學生活結束了,我的快樂時光亦告終。

作者:霏子

霏子
Fayly .Party Host .不務正業、自甘墮落 .香港大學主修文學及文化研究

閱讀後覺得好,請多多讚好及分享~:)

其他熱門文章

  • 點先可以令男人唔好偷食? by 木頭
    衰啲咁講,你地由細到大所有來自電影、劇集、小說入面果種忠貞好男人,好似耶穌、真神同觀音一樣——係,冇人可以證明佢地唔存在,但同時亦都冇人可以大大聲聲話佢地親眼見過。就算你有姊妹同你講佢見過,甚至親身擁有過,都只不過係源於佢地唔了解佢地身邊嘅…
  • 【遊戲新聞】最強多人喪屍遊戲 《Left 4 Dead 2》相隔十年推出最後大改版 by 五木
    經典遊戲《Left 4 Dead 2》推出超過十年,話佢係最強多人喪屍遊戲應該都無乜異議(雖然我覺得一代正啲) […]…
  • 傳訊息=互FLIRT?你點睇? by 毋乜贊
    我地就唔好局限喺性別上,社會有同性戀有異性戀,我就一概講sd短訊俾非戀人(講緊係一個駁一個嘅短訊)。耐唔耐約下食飯,傾下心事,八下邊個同邊個係咪有路/分左手,我搵朋友嘅原因都離唔開lee幾個原因,一句起兩句止,而行街睇戲食飯等,我都可以一個…
  • 做求職者都唔一定要卑弓屈膝嘅 by 小盛女
    「我哋而家都見緊好多candidate,所以有個基本要求,就係你2日內要send個email比我哋,講下你可以為公司貢獻啲咩,有咩可以impressed到我哋,有咩優點同工作經驗,說服我哋點解要揀你,咁我哋先會再考慮叫唔叫你second i…
  • 評論人高調收禮物拆禮物,有無職業道德問題? by 論政西人
    你看看?當時評節目主持,都可以這樣子高調收禮物,收完禮物之後就在節目的面書說自己收過什麼禮物,日日收月餅,收到手軟,還有禮貌地說多謝。不知道,若將來這些品牌,這些機構發生什麼事,晴朗主持,又會不會可以持平評論呢?…
  • 我幾點收工關你叉事咩! by 小盛女
    「你呢排係咪好得閒?我見你成日都好早收工,琴日六點幾已經唔見你。」人事部Macy說。「我放六點,六點半我先走㗎喎,而且準時收工都正常啫。」我說。「無,想睇下你係咪好得閒咋嘛,以前你成日都好夜收。」Macy說。…
歡迎讚好我們的facebook page,免費資訊源源送上。

文章資訊

ID: 187472
Date: 2018-11-23 06:28:54
Generated at: 2020-09-28 16:04:06
Permalink: https://www.vjmedia.com.hk/articles/2018/11/23/187472/組爸不要畢業好不好?