如果班學生掛住睇漫畫,就唔會玩麵粉玩到爆炸

 

唔知點解最近一單粉塵爆炸,都會引起論爭。

有人話粉塵爆炸唔係普通科學常識,唔知玩大左而受傷係正常既。我唔打算係呢度特別再挑起啲乜,因為好多時候去拗果樣係唔係常識,應唔應該做,實在係無咩意義。關鍵在於,出左事,點樣預防,唔好再有悲劇發生。今次如果只係受輕傷,就係屬於好運。無人知下一單會唔會好似果陣台灣某個音樂嘉年華咁,樂極生悲,就天堂變地獄。死傷枕藉。

我天真少少諗,如果有個人沉迷下睇漫畫,可能有時都會少單意外。因為漫畫都有唔少知識可以吸收架。例如鋼之鍊金術師入面,就有一個好出名既人物,叫做焰之鍊金術師馬斯丹上校。既然叫得焰,當然識得撻火。而佢唔單止識得撻火,佢仲要隨口都教人點樣可以引起爆炸,呢個完全係科普黎:

唔知第幾話佢同佢下屬接近人造人既巢穴,同七宗罪之一既色欲對峙,當時都唔係真係想打而係想走為上著,佢就情急智生見到地下既水,生出一個策略:「水可以提鍊出氫氣,加上呢度係一個封閉既空間。。。」無錯,佢其實講緊既就係火必須既三角形:可燃溫度、燃料同埋氧氣。有空氣,有氫氣,再加一個打火機,成功引起爆炸。當然炸唔死人造人,呢個同題目無關啦。

至於如果我無記錯,斯卡雖然係大反派,整死左唔少人,甚至連「哥哥同我玩」都命喪於佢手下,但係佢一樣唔會得鋪蠻力。又係唔知第幾冊佢又唔知同邊個打打下果陣,一樣利用到粉塵爆炸製造掩護俾自己鬆人。如果唔講鋼鍊既話,最近做第三期既魔法禁書目錄,LV5既第一,一方通行,亦都曾經試過引起粉塵爆炸,之不過,佢都係打唔贏主角威能既當馬咁解(當馬係眾所週知開外掛既)。有下爆炸場面當然亦都令畫面係生色不少既。

同火一樣,粉塵爆炸就一樣係燃料、氧氣、封閉空間(高濃度塵霧),然後加過火或者火花甚至係靜電摩擦就得喇。所以。唔好睇少毒撚。唔好睇少漫畫。完。(想寫幾句寫左篇野出黎添。死。要去切手指。)

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 187494
Date: 2018-11-23 20:21:00
Generated at: 2019-03-22 15:09:12
Permalink: https://www.vjmedia.com.hk/articles/2018/11/23/187494/如果班學生掛住睇漫畫,就唔會玩麵粉玩到爆炸