反對派各懷鬼胎口蜜腹劍,2020工黨點算?

 

今早在美孚謝票,謝謝居民對我的支持,亦聆聽到大家對香港未來的憂心。未來,我們更要壯大公民社會,監察議會及政府,抵擋惡法通過。

李卓人 Lee Cheuk Yan 發佈於 2018 年 11 月 27 日 星期二

 

選舉明明係要多票過對手,喺電台都講左幾次,呢排我諗左好多日,諗來諗去都覺得無理由丫,我一直都搵唔到個原因,可以解釋點解所謂嘅泛民主派各大佬,喺呢次補選會不斷咁屌票,不斷咁鬧人,我之前比較天真,用純粹「為啖氣」、「食老本」、「懶」,去總結呢個現象。

但係今朝睡眼惺忪嘅時候,個腦突然靈光一閃。

我一直跌左落「飯民坐埋一齊就係團結」呢個圈套。然後所有分析,都係圍繞佢地呢次補選點做得唔好,點可以更好,我忽略左嘅係,佢哋視呢一次補選係鋪排俾2020,而呢個鋪排,係為自己嘅政黨鋪排,而工黨嘅生死,佢哋係置諸道外嘅,用邏輯嘅術語,係irrelevant,用統計學術語,係independent。

唯有咁樣,先解釋到,點解我前老細梁國雄,要話選民係蛤蟆,蛤蟆嘅票佢唔要。

唯有咁樣,先解釋到,點解公民黨余若薇選前一日仲去緊銅鑼灣行名店,竟然仲夠厚面皮話黃埔區議員鄺葆賢唔夠落力。

唯有咁樣,先解釋到,點解民主黨李華明選完仲繼續話,本土派根本唔應該視為民主派。

 

因為佢哋唔係想工黨夠票贏,佢哋只係借呢個機會,向中共表明自己只係忠誠的反對派而不是搞港獨,簡稱「表忠」,同埋各自鞏固自己嘅票源。

本土派(如有)仲諗緊反對派無左佢地啲票點有可能贏,原來飯民已經走前好多步。

姚松炎呢啲猛將,選之前明明講到又專業又勤力,好喇到輸左,就被飯民輿論機器描繪講成為唔識搞組織唔識搞地區唔識搞選舉。

到今次選前選後,各反對派大佬大姐,不斷大放闕詞,將敗選責任歸咎其他人,總之唔係自己錯,係啲本土派(如有)唔幫手拉票,唔係佢地無搵個好嘅方法請本土派(如有)幫手拉票,唔係佢地嘅政治素養令唔到本土派(如有)投票俾佢。佢地唔關心本土派(如有)嘅人睇到呢啲說話有咩感受,因為你嘅感受,只係過戶落今次輸嘅工黨嗰度,世人永遠記得輸嘅係工黨,而其他飯民大佬大姐,佢地只係向支持者喊話,「我地同你地都無做錯到!」,錯嘅只係人地,係THEY wrong 啦。

 

回歸後立法會推行比例代表制,邊個當日揀呢個制度嘅,應該名留青史,完全係喺反對派嘅堡壘內部開始破壞,有呢個制度,佢地永遠只需要諗,點樣拿住自己嘅10% 或以下嘅支持率就夠,而同一個政治光譜嘅人,先係最重要嘅敵人,而自己嘅支持者又唔鍾意你鬧「同路人」,咁點算,原來係以「李」之名,不斷委過於人,既可以破壞工黨形象,又可以將責任推卸,鞏固自己嗰10% 或以下嘅支持率。

行政主導,虛化議會,中共嘅政術中共嘅手腕,真係唔到你唔服,厲害嘅係,反對派唔係唔知,而係佢地好似飛蛾咁,見到光就撲埋去,理得佢嗰粒係LED 定係熱辣辣嘅燭光。覆軍殺將,必以五危,不可不察也,就係咁解。

至於新東補選?食花生睇戲啦,上次范國威贏咁多。

 

作者:白木乩

白木乩
聽聞係總編分身,專用來出D 與總編身份不符既膠文

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 187798
Date: 2018-11-30 18:22:45
Generated at: 2020-02-22 00:14:46
Permalink: https://www.vjmedia.com.hk/articles/2018/11/30/187798/反對派各懷鬼胎口蜜腹劍,2020工黨點算?