【保險界那些事】在酒吧溝女再呃單的保險佬

 

 

「Bohimlo,得唔得閒出嚟食個飯?」大學畢業一年,師妹Fanny無啦啦WhatsApp我,約我單獨見面。

「好呀。」我冇問咩事,而係一口答應佢,見咗面先了解。Fanny同我唔多熟,佢今次主動搵我,我真係非常驚訝。

因為我係一名保險佬。

我明白,好多人唔想同保險佬食飯,因為怕俾人sell保險。所以,從來只有我地約人,冇人約我地。而我唔想冇咗班朋友,所以冇向佢地埋手,而係出去搵客。但係,點解Fanny明知我係做保險嘅,都夠膽約我單獨見面呢?佢唔驚我sell佢咩?於是,我就去咗食飯,一探究竟。

「Hi Bohimlo,咁耐冇聯絡,多謝你肯同我食飯。」一見面,Fanny就好客氣咁多謝我。

「傻啦,食個飯唧。點解你會搵我嘅?」我單刀直入。

「因為,我知你做緊保險。」Fanny吞吞吐吐地說:「我有啲事想請教你。」

哦!原來正正因為我係保險佬, Fanny先搵我。我追問:「哦,原來係咁!咁係咩事?」

「唉,我買咗個plan,而家爭落十二萬卡數呀⋯⋯」

「吓!發生咩事呀?」我真係嚇親!於是, Fanny開始說明⋯⋯

兩個月前,Fanny同朋友去酒吧飲嘢,一位高大英俊、名叫Terry嘅男士上前搭訕,拎咗Fanny電話。須知道,Fanny係一名唔識打扮、唔太吸引嘅少女,A0咗20年。佢咁大個人,唔好話拍拖,連曖昧都未試過,而家天降美男問佢拎電話,佢緊係招架不住,日日WhatsApp,同Terry瘋狂互flirt啦。

之後,Terry同Fanny「拍拖」了。Fanny對拍拖冇乜概念,以為Terry求其表個白,大家叫下bb,就係拍拖。事實上,二人「拍拖」以來,只係傾下電話,出三五次街,同拖過一次手咁大把。明眼人一睇就知, Terry係玩鳩Fanny啦。

咁Terry嘅目的係咩呢?原來,Terry係一名財務策劃顧問,即係保險佬。「拍拖」一個月,Terry就有份「禮物」送畀Fanny了。佢話,知道Fanny嘅家境清貧,冇乜錢拍拖,所以想送份儲蓄保險畀Fanny,幫佢儲錢,以後結婚。最好笑嘅係,佢所謂嘅「送」,只係負責揀個plan、出張單,保費由Fanny全數負責,一共十二萬。因為Fanny好鍾意Terry,所以佢第一個反應都係好開心。但係,佢真係冇錢,所以佢拒絕咗。呢個時候, Terry就發功了。

「乖啦bb,我咁做係為你好㗎。我同你都搵得唔多,拍拖已經要慳住慳住,以後點結婚喎?你而家努力啲,打多兩份兼職,買咗個plan,好快就有回報!」

「但係,我真係冇錢喎⋯⋯」

「唔緊要,我同你申請張信用卡,畀咗錢先,然後分期付款,你每月還少少,慢慢清咗佢囉。」話口未完, Terry就拉咗佢去銀行,極速申請信用卡,買埋個plan啦。

「Bohimlo⋯⋯我想問呢個plan係咪真係有用㗎?」Fanny拎咗份保單出嚟,戰戰兢兢咁交畀我。

「頂⋯⋯」我衝口而出。Fanny份保單係一個巨額儲蓄plan,一年要供成十二萬,啲錢45歲先攞得返,呢啲plan唔係冇用,不過係畀啲有錢、有返咁上下年紀嘅人用,唔係畀佢呢啲清貧大學生買囉。重點係,呢個plan嘅commission好高,所以Terry簽到可以話係賺咗一筆。

我思考咗一陣,好婉轉咁向Fanny說明:

一、佢地呢啲唔係拍拖

二、個plan唔啱佢

三、Terry好可能係呃佢錢同感情

「呀⋯⋯佢唔止呃咗我啲錢,仲呃咗我上床呀⋯⋯」我講完, Fanny即刻淚如雨下,同我講Terry同佢出得三五次街,有兩次係去咗開房,佢已經俾人呃咗隻豬。

頂!而家啲保險佬咁仆街嘅?騙財騙情又騙色,拖累同行都算!仲要呃埋人個處!?

「仆佢個街!張單幾時簽嘅?我幫你退咗佢!」我大力咁拍咗一下枱,企起身同Fanny講。

Fanny嚇一嚇,就話:「上星期五簽嘅⋯⋯」好!非常好!未過21日,仲有得搞!

於是,我問Fanny攞咗個賤男嘅卡片,即晚寫咗封email去佢公司,附上Fanny嘅親筆簽名退保信,投訴並要求退保,cc埋畀賤男。

第二日,Fanny就收到賤男嘅WhatsApp:「退咗你份保單了,唔該你個朋友唔好畀麻煩我。」你見到啦?賤男老羞成怒了。拍拖?結婚?為佢好?一派胡言。經過今次教訓,Fanny都清醒咗,明白真正嘅男朋友,係唔會逼你幫佢開單㗎。Fanny話想多謝我,要幫我買個plan。

「唉,唔使啦。阿女,如果你想買份醫保、旅遊保,就隨時搵我啦。」真正嘅朋友,又點會明知你窮,叫你買張大單,賺你一筆commission啊。

 

【保險界那些事】

日常分享 Instagram: https://instagram.com/bohimlo

 

作者:Bohimlo

Bohimlo
90後保險佬,細個想開玩具店,送玩具畀小朋友,大個去咗做保險,同客人嘅仔女買儲蓄保險,等小朋友有錢買玩具。 日常分享 Instagram: https://instagram.com/bohimlo

閱讀後覺得好,請多多讚好及分享~:)

其他熱門文章

  • 港人學樂器小心被騙財——大提琴掠水記 by 莊公公
    二手琴市場好細,賣出去唔容易,價錢好低,香港地寸金尺土,仲要佔地方,即係擺明被勒索,如果唔係冇好日子過,以後上親堂有排煩。…
  • 【PR】開放世界獸人 x 功夫動作 RPG《BIOMUTANT》今月推出多平台對應 by VJGamer
      Epicsoft(Hong Kong)Limited 今日宣佈,由 Experiment 101 […]…
  • 鑽戒 by 藍兼併
    程子晴嫁給富商翁恭時只有24歲,而翁恭比她年長26年,二人的婚禮在五星級酒店舉行,城中名人富豪紛紛到賀,這段婚姻被外界視為父女戀,而程子晴承受着貪財嫁富翁的惡名。…
  • 朋友,並唔係要嚟搵笨㗎! by 小盛女
    「未諗㗎,都係落吓FB、Google廣告果啲,我畀啲相同價錢你,你幫我執吖。」Grace說。 「你係想我幫你整?你話我知總共要整幾多樣,幾時要完成,我再quote個價畀你啦。」我說。 「唔使咁大陣象!我哋咁熟,想你幫吓手咋,好簡單啫,你…
  • 如何成為護士?(包括登記護士與註冊護士) by Su子
    呢篇野係寫俾考完DSE,有志投身護理界既所有同學。…
  • 正常生活 by 健吾
    當我看到新聞評論,大家都在一面倒的討論感染者的「私德」不檢,導致大家連假都沒了。這樣子的狀況,似曾相識。就好像是,當愛滋病流行之時,「普通人」、「未感染者」把所有同性戀者的性慾當成是罪,只要你有「性行為」,你就是錯。…
歡迎讚好我們的facebook page,免費資訊源源送上。

文章資訊

ID: 187933
Date: 2018-12-04 07:23:42
Generated at: 2021-05-19 08:26:35
Permalink: https://www.vjmedia.com.hk/articles/2018/12/04/187933/【保險界那些事】在酒吧溝女再呃單的保險佬