美斯喺香港出世的話,真係唔會做到球王

 

美斯同曹星如真係有啲相似之處, 又係身型上冇優勢,又係技術型運動員(即係唔靚仔), 又係同自己青梅竹馬嘅女朋友結婚(羨慕)。 美斯踢波可以踢到受萬人景仰, 但曹星如打到去世界第一仍然有好多香港人唔認同,而家仲要轉埋打業餘拳賽。究竟兩個人嘅成長路有幾大分別?

首先,喺未成名之前,喺香港係無一個有系統嘅方法去訓練佢自己打職業賽。唔會好似美斯喺巴塞隆拿咁樣輕易搵到青訓機會。 雖然曹星如都好好彩,自己屋企人本身都係打開拳有曬人脈,但規模同系統始終比唔上外國。 如果美斯要喺香港踢波,真係要咁好彩佢老豆係南華主席先有機會上到位。

第二,到開始出名之後, 香港會有獨有嘅網絡Haters大軍去攻擊呢啲運動員。 雖然美斯都有Haters, 但好少有一個嚟自本地地區,可以衝出道國際嘅運動員,會受到一班當地市民嘅攻擊。 曹星如一直都備受不公平嘅罵聲, 好彩佢心理質素夠好,冇收到呢啲嘅影響。 如果美斯喺香港踢波開始出名, 好可能又有一大班連登仔話佢係死矮仔,專揀個廢嘅對手去扭過。

到最後,當運動生涯結束, 其實係香港並冇妥善照顧運動員退下火線後嘅生活。 美斯跟死一世巴塞隆拿,我諗佢退休之後球會都一定會會留個位俾佢。 但如果美斯係喺香港嘅話,除非佢之前已經搵落好多廣告費、代言費,如果唔係退休之後,真係樓都唔會買得起。

直到今日,曹星如宣布放棄打職業,放棄個人榮耀,轉為做業餘拳手去備戰奧運。 要知道轉做業餘拳手,就等於要放棄以往有嘅出場費、金腰帶,同佢曾經嘅世界第一排名。 但佢選擇放棄代表自己,而轉為代表成個城市,對運動員嚟講一個係好有風骨嘅做法。美斯覺得國家隊隊友廢,都選擇退隊啦;但曹星如不斷畀香港啲網民鬧,反而仲更有動力去代表香港, 我覺得香港人欠咗佢一句多謝。

我哋成日話,美斯係香港唔會做一個球王,係因為佢父母唔會支持佢,同埋玩體育搵唔到食。但曹星如嘅事例證明, 就算你家人支持,就算你搵到錢,就算你話呢樣運動玩得幾叻,都好難成為到一個「球王」或者「拳王」。 因為香港人自己都唔會支持佢。香港人就係咁犯賤,一味鬧香港體壇一潭死水,但另一方面又淨係識對運動員冷嘲熱諷。今日曹星如正式離開職業賽事,下一個曹星如幾時會出現?而我哋又會點對佢呢?

 

作者:睇肉子

愛體育,也愛睇肉

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 187959
Date: 2018-12-05 05:13:24
Generated at: 2020-10-25 02:18:42
Permalink: https://www.vjmedia.com.hk/articles/2018/12/05/187959/美斯喺香港出世的話,真係唔會做到球王