好多人話香港而家係「零售寒冬」，我就覺得，睇生意啦，有舖頭要交租嗰啲就一定唔好做架啦，業主每個月都食你大半收入啦。
我未必特別有生意頭腦，但係，我仲識計數。賣野，要人流夠旺；要慳，就唔好要我交租。邊度可以咁筍？旺角地鐵站好未？呢個根據健力士紀錄人口密集度係「130,000 people per sq km」嘅地方，由我懂性開始，我就知道，呢度係財源，呢度係我嘅根，呢度，係我理想嘅發跡地。
賣咩？電子野囉，電話用品囉，行去肥佬開倉又要時間，上淘寶又要等佢運落黎，不如順路就喺地鐵站買埋。我呢條橋 Work 架，為左做生意，我驚你有牙？你有你追趕，我有我重生，今日擺 C 出口，聽日擺 E 出口，Catch me if you can，特別係你其實無權拉我。
不過，日日擺檔咪話唔攰，呢種玩法其實有啲悶，之但係呢一年以黎，有一個人嘅出現，令我對呢個地方多左一份糾結嘅心情。
有一個男人，佢成日喺我開工時偷拍我。
個男人身高一米八，望落去似讀書人，我唔知，但我覺得佢好留意我，因為有一次，我見到佢影我。
我唔出聲，我唔想嚇親佢，唔知，因為佢比我嘅感覺，無惡意，佢個樣好親和，雖然我唔知佢影我黎做乜，係想叫朋友黎買我嘅貨嗎？嘿，打折比你又何妨。
但係佢唔係成日出現，我唔知幾時開始，開檔，係為左等待佢嘅出現。
佢今日又黎了，我手心有啲濕，因為佢唔係影我，而喺將自己都入埋鏡咁⋯⋯
佢同我合照。
好可愛，呢個人。我刻意唔望佢，刻意擰轉頭去掩飾我面上嘅笑意。
佢影完之後好快又走左了，我遙遙望住佢嘅背影，我微笑。
雖然唔知點解你成為我開檔嘅動力，但係我期待下次再見你呀。
又雖然唔知點解，好多時見完你，就會有地鐵啲人黎追趕 Me⋯⋯
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2018年12月5日
