「唉Esther，我想recruit啲人入我條team呀，其實我要求唔高，大專畢業，有責任心就得，點解咁難搵㗎呢？」我向師妹Esther苦訴。
「唉Bohimlo，保險、倫敦金、美容、健身而家係香港四大伏呀，有返咁上下學歷，都唔想入行啦。」Esther直言。
「吓！保險都有份？」我實在嚇親，喂衰啲講句我地係sales，但sell保險都叫正當職業掛？三年前我入行嗰陣，真係唔知保險個名咁差！
「嗱，我知你好人嚟㗎。但你要明白，保險經紀嘅入行門檻低，而且樹大有枯枝，真係有好多伏人㗎。」Esther語重心長咁講。
「吓？佢地係點嘅？」
「一堆精神分裂嘅病人⋯⋯」於是，Esther指出保險界伏人嘅一大特徵——形象正面內心負面。
大部分人都想為自己建立一個正面嘅形象，保險佬亦然。因為我地sell嘅唔止係份保單，仲係我地嘅個人品牌。講真，保單就個個經紀都賣到畀你，但服務就人人唔同，同一份保單，你緊係想搵個你一有冬瓜豆腐，佢就可以即時幫忙嘅經紀啦。所以，我地要建立一個好嘅形象，客人先有信心畀張單我地跟。亦因為咁，好多經紀都會執靚自己個Facebook，令自己成為一個好正面、優秀嘅人，等客人信任佢。
但係，部分經紀或者太過火。佢地會一日post十張相，內容主要係感謝客戶信任、又得獎了、喜歡我的團隊⋯⋯一系列嘅保險業務分享。佢地嘅post唔止洗版，而且內容千遍一律，盲目正向，反而令人唔舒服。
「屌，我有成十幾個保險朋友，佢地每人每日post十次，我都睇成百次啦。見到佢地啲『正能量』，反而令我有負能量！」Esther話。
「但係，有時我地唔sell下自己，啲客真係唔了解我地㗎喎⋯⋯」我為同行辯護。
「如果你好熱愛你份工作，你份人又真係咁正面，我都冇咩嘅。」Esther話：「問題係佢地精神分裂呀嘛。」
原來，呢班喺Facebook表現正向嘅經紀，喺現實生活入面，係十分負面㗎。佢地會有兩個Facebook或者Instagram，一個用嚟post嘢畀客睇，另一個用嚟放負，講下啲同事簽床單、啲客呃飯食又唔買單、冇買單又有意外嘅人抵死等等，十分恐怖。
「嘩⋯⋯呢啲係咪物極必反呀師妹？」
「冇反過，佢地本身就係虛偽，」Esther笑言：「我呀，之前去飲酒，親耳聽到個經紀話個客對佢衰，佢特登唔同佢claim咁多𠻹呀。最好笑係，條友第二日就出post，話自己盡心盡力咁湊客，終於幫佢claim到最多嘅賠償！」
「好癲⋯⋯Esther，我真心有同你claim到盡㗎。」我急住為自己利申。
「放心喎Bohimlo，我唔係畀說話你聽。不過，而家咁多精神分裂嘅經紀，真係令經紀個名衰咗，嚇走咗唔少想入行嘅人，你要recruit人，就難啲啦。」
唉。
日常分享 Instagram: https://instagram.com/bohimlo
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2018年12月6日
