如果你女朋友肯講道理. . . . . .

 

 

我諗依個係所有男人嘅其中一個夢想,緊要過有樣有身材,唔係講笑。

或者你拖住一個女神級嘅靚女出街嗰陣可以吸引一眾男性帶住羨幕目光望住你地,但平時佢左一句我唔理右一句我要買出親街唔洗你幾千都唔安樂,依啲真係有苦自己知。反而一個咩都會為你著想,唔想你亂洗錢,你有咩難處都會體諒嘅先更加係一個真正嘅女朋友。你公事同佢呻兩句唔會話你冇用、你月尾冇錢食貴嘢唔會黑你面、佢生日你冇買名牌比佢唔會嬲你,因為佢知你同佢一樣都係人都會有難處,而且唔係個個人可以拋幾皮嘢出嚟買名牌都面不改容。

噉嘅女朋友有邊個唔想要。

正如女人拍拖係想喺當中搵到被愛、被關心、被照顧嘅感覺。男人其實都一樣想要,而且更重要嘅係對住女朋友可以同佢講自己其實好攰,然後攬住女朋友比佢掃下自己背脊。冇錯,男人唔單止係大細路,可以嘅話佢直頭希望做返個BB,而唔係對住女朋友都好似對住個老闆一樣要做到哂佢嘅要求,連放鬆一下嘅機會都冇。點解咁多男人唔鍾意傾電話?唔係傾電話依件事本身有問題,而係傾電話嗰陣通常都係比女朋友連續轟炸兩三個鐘,慘過返工比老闆照肺。

一個講道理嘅女朋友唔止唔會提出一啲好無理嘅要求,好似日日接放工啊,晚晚傾到凌晨三點之類。最重要係一個唔好彩你地因為一啲事而鬧交,佢都唔會情緒勝過一切,要你又跪又拜先冇咁嬲你,然後仲要又洗錢買大一堆嘢氹佢開心。只要搵到個問題所在,然後解決咗佢,一場小吵小鬧嘅風波就唔會繼續落去,好快你地又可以恩愛如初。當然啦,一個理性嘅女朋友唔代表你唔需要錫佢遷就佢,不過你做咗佢會覺得你係好,而唔係你做咗佢會覺得係應份,單單依個分別已經係差天共地。

如果你女朋友肯講道理,我真係要恭喜你,因為你終於可以知道咩叫拍拖嘅真正快樂。

 

 

作者:毛言地

毛言地
你有多久沒去找自己的理想?搏殺一天,回到家,倒頭就睡。 無言,只因生存太累。談理想?妄想; 毛言仍言,只因理想,本就是「理應去想」 http://www.facebook.com/MaoYanDe

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 188016
Date: 2018-12-06 18:12:12
Generated at: 2019-06-26 21:15:16
Permalink: https://www.vjmedia.com.hk/articles/2018/12/06/188016/如果你女朋友肯講道理