我每日返工前都會路經地鐵站裡面間華御結——利申無收廣告費寫呢篇文（如果見到想搵我合作我好樂意），而我出門嘅時間多為 Lunch Time 前嘅時間，好多時我會見到一個好有趣嘅畫面，就係有個師奶，買完兩粒飯團，就會企喺門口用九秒九速度狼吞虎嚥，一邊同人講電話或者 Voice Message。
我當時心諗點解要食得咁急呢？呢個問題纏繞喺我心入面好耐，耐到我有時問自己咁無聊嘅事，點解要擺喺心入面咁耐，直至最近，我終於搵出真相。
然後，星期一，我又見到嗰位師奶，同樣地食緊飯團，同樣地食得好急。正當我行去隔離便利店買野、排隊比錢之時，我聽到佢講電話……
「一陣約左呀 Hailey 同 Ryan 媽媽飲茶，所以而家食緊華記飯團呀……」
「咩呀，廢Q事啦，上次我食兩舊腸粉比人問我係咪好肚餓呀，仆佢個街，得佢識扮細食呀？」
扮細食……
我聽到呢度，忍唔住自己對衰眼，望左一望呢位師奶，又真係的確圓潤，唔怪得比「Hailey 媽媽」串。我知道而家師奶係唔易做嘅（OK 暫停，唔好討論生唔生仔呢個話題住），湊仔湊女辛苦之餘，亦有好多阿太唔放過自己，要扮哂中產扮哂有貴氣，扮哂 well-educated and elegant，例如我之前喺街頭聽到有老母話「我想學 Victoria Beckham 著 High Heels 然後單手抱女同老公出街拍拖」，聽到我內心充滿敬佩之意。
不過，為左飲茶扮細食，所以事前啪飽個肚，呢個行為，到底係「做乜野」抑或係「何苦呢」真係睇你點睇，我亦唔知道呢位師奶係異數，抑或而家啲「媽媽 Group」真係咁鬼人性黑暗……係嘅，有女人嘅地方就有是非，有人類嘅地方就會有比較。
辛苦哂一眾年輕老母們，我終於明點解我有時星期一同父親大人去飲茶時，會見到一枱師奶，叫到一枱點心，凍哂都無人敢大啖食，個個慢嚼細吞，連起身去個廁所，行動如弱柳扶風，真係唔講都唔知香港女子儀態學得咁好。
雖然我個腦都只係會響起佢講電話嗰句，「仆佢個街，得佢識扮細食呀？」
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2018年12月6日
