澳門獨特文化之旅——櫻桃酒與書法大師

 

 

講明先,今次係有客戶資助我去澳門走個圈,然後最尾貼下相關推廣訊息咁,咁好啦,我就將我嘅旅程見到咩,話俾大家知。

本來接到呢個客,佢嘅要求就係去澳門,我首先覺得,賭場對我呢啲唔識咩叫「或然率」嘅人,in the long run 我輸梗嘅嘢,我無咩興趣,所以由一開始同廣告公司協商,我都係話我有個意念,就係去搵一樣香港人好少見到,喺澳門就搵得到嘅葡萄牙飲品——櫻桃酒。

所謂櫻桃酒,其實唔複雜,只係用櫻桃加糖再發酵而成。飲食文化同習慣,每百幾年就轉一次,香港人一百年前都唔食炸豬扒,所以人地嘅嘢,我無考據之下都唔識好確實咁講太多,相傳櫻桃酒係喺13世紀就出現,聽聞最初係因為啲人嫌櫻桃太酸,唔好嘥不如就加糖釀酒用來飲,時至今日葡萄牙人會喺條街度,就咁一樽兩樽開來一路飲一路吹水,我諗個玩法就好似香港人去球場飲啤酒咁。

 

 

要搵呢支野一啲都唔難,喺正遊客區有個地方叫仁慈堂婆仔屋,有間舖頭有得賣。呢支700毫升,158蚊,可以俾港幣,買完就梗係即場開來飲啦。果然,歐洲人嗜甜係無限度,明明係酒,可以甜到咁,個樽寫住酒精含量23%,一杯兩杯三杯,可以唔覺唔覺飲左好多。呢樣嘢都唔難理解,香港天氣悶熱,香港人唔鍾意食甜野係好順理成章,但歐洲冬天好凍又無乜陽光,食甜野先令人開心。

 

順帶一提,店員圓碌碌,好靚女。

 

0.7L賣$158,1L就賣$188,澳門幣同港幣都收。

 

Mercearia Portuguesa 葡國天地百貨
地址:澳門望德堂區瘋堂斜巷8號仁慈堂婆仔屋內

 

因為客戶安排左行程,從婆仔屋行出來,就諗住搭的士趕下場。呢個世界,最美好嘅事,有時就係喺最無安排之下咁發生。

行落去兩步路,有間建築物,好舊,門口寫住「大瘋堂」,我心諗,我都係癲佬啵,啱曬,過去睇睇先。行到門口,有位小妹妹即刻俾左件蛋糕我食,仲話呢度平日唔開放,只係呢兩日因為幫山區學校籌款,所以半展覽半義賣。做人嘅野,都食左人地件蛋糕,無理由唔擺低幾十蚊吖,咁擺低左幾十蚊,又無理由唔入去打搞下吖。

入到去,見到個光頭大叔喺把扇上面寫字,佢坐嘅位置,喺正個大堂嘅中間,望住個出入口,我諗呢啲就係所謂嘅佈局,問都唔洗問,一睇就知道呢度邊個話事,身為客人,我都有基本禮貌,見到話事嘅大叔,我就梗係行埋去,講句「多謝你嘅招待」,寒暄N句咁。

 

 

敝網嘅名叫「輔仁」,《論語》記載曾子話「以文會友以友輔仁」,跟得我貼嘅讀者都可能早已經知道成立原因同埋我呢幾年嘅經歷,喺度唔多講啦。咁「輔仁媒體」嘅logo,其實係來自一位台灣篆刻師嘅大作,每次有人問我攞logo 話要乜嘢向量圖,我就話我無啲咁嘢,不如我印俾你,我真係有呢個印仔,而且我係隨身帶著,「朕即輔仁」吖嘛,個印仔係我嘅護身符。

我見大師寫字咁靚,檯面好多印仔,為左R野講,我就將我帶著嘅印仔俾大師睇下,原本諗住佢都係睇下,點知大師果然係大師,睇印鑑佢係即刻沾上硃砂,印一次個印落白紙度。睇完,佢細細聲咁「哇」左一聲,然後話「我都好鍾意用木造嘅印」,再然後,就係佢話大家既然咁有緣,要送幾隻字俾我。

 

 

我諗大隱隱於市就係呢啲。大師名叫蔡傳興,因為要等啲墨水乾,佢分享左好多嘢,包括點解佢呢度平日唔對外開放,點睇澳門書法界,點睇周圍咁多旅客,我問佢可唔可以寫下,佢話唔好住,等下次講得好啲先。但有啲嘢都寫得嘅!蔡老師話,我地所在嘅地區,好耐之前唔係俾正常人住,而係隔離一啲麻瘋病人,呢間野叫「大瘋堂」,個瘋字係麻瘋,唔係瘋癲,雖然蔡老師講笑話自己都有啲瘋癲。

 

 

呢次係一次好難忘嘅旅程,張墨寶我會拿去裝裱好佢,而我都準備帶多兩位識多少少字嘅朋友過去拜會佢多次。好野係有錢都買唔到。

澳門唔只係得五光十色,錢係要搵,但搵左嘅錢,其實係要令自己同埋身邊嘅人生活的更開心,而好多開心係無價。櫻桃酒唔係啲咩名貴嘅酒,同朋友傾下偈飲完覺得香甜抒懷,就係佢嘅價值;而我之後嘅旅程,我諗讀者唔係咁容易複製,因為蔡老師話佢雖然日日都喺大瘋堂,但平日唔會咁容易打開度門俾人入去,而我就google 到蔡老師耐唔耐就會有展覽,有興趣嘅朋友可以留意下。

 

大瘋堂藝舍(平日假日都不會對外開放)
地址:澳門望德堂區瘋堂斜巷7號

 

廣告時間

多謝客戶讚嘆客戶,身為媒體,客戶養我育我,既然有客戶委託廣告公司俾錢我去澳門走一轉寫篇特約文章,我當然冇問題啦。

香港聯交所編號0221.HK 嘅易易壹金融集團,旗下有間易易壹財務,即係黑仔姜皓文做代言人嗰間,就係贊助我嘅客戶。佢哋要求今次我過澳門要喺觀塘坐「直通巴」行港珠澳大橋,去嘅體驗係舒服嘅,走大橋看珠西看澳門就係又平又方便,船飛講緊差不多$200嘅時候,直通巴平日都只係$160啫。至於本身想去澳門其他地方嘅讀者,就要自己考慮返行程需要。

 

 

總之就係,感謝客戶賜我澳門巴黎人一晚住宿;今個月成功申請易易壹財務指定計劃嘅讀者,就可以獲贈澳門巴黎人雙人大床房一晚,連港珠澳大橋來回直通車車票兩張。按呢度就可以了解詳情:www.221.com.hk

忠告:借錢梗要還,咪俾錢中介
查詢及投訴:221 77889
放債人牌照號碼:0521/2018

 

 

澳門巴黎人過夜:聖誕樹大家就見得多,倒轉嘅大家又見過未?

 

作者:容樂其

我覺得總編輯都有得出文係常識囉!

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 187838
Date: 2018-12-08 06:16:50
Generated at: 2021-12-05 15:39:07
Permalink: https://www.vjmedia.com.hk/articles/2018/12/08/187838/澳門獨特文化之旅-櫻桃酒與書法大師