【保險界那些事】去speed dating 溝客的保險女

 

 

「喂Bohimlo,你平時有冇去開speed dating?」今日客人David 同我傾單,傾完佢問我。

「冇呀,平時湊客都忙啦,仲邊得閒識女朋友,哈哈。」我同David 識咗好耐,有話直說。

「屌,唔係去識女朋友呀!係去搵客呀!」David 語出驚人。

「吓!乜有得咁玩法㗎咩?」我真係嚇親!於是,David 就同我分享一則故事啦。

話說David 老婆,即係阿嫂啦,就做speed dating 嘅,有十年經驗㗎啦,兩年前仲開公司,自己做老細𠻹。有一日,一位叫Taffy 嘅女客嚟登記,一次過報晒下個月嘅speed dating。出奇到啲junior 都報上去,話畀阿嫂知。嗱,出奇不在於佢報晒成個月嘅speed dating,進取過佢嘅女人大有人在,出奇在於Taffy 好靚女,係靚到可以選港姐嗰隻,而且三大畢業,現職顧問,二十六歲月入四萬!Taffy 嘅條件咁好,點使紆尊降貴,嚟阿嫂間細公司搵另一半呀?

其實,有Taffy 呢一位女客都好嘅,一來賺多咗錢,二來個個speed dating 都有佢撐場,相信會大大提升男客嘅滿意度。不過,阿嫂咁多年經驗,就冇諗得咁簡單啦,佢估計Taffy 係有啲問題嘅。 於是,阿嫂親自跟Taffy 呢個case 啦。

Taffy 去嘅三兩場speed dating,阿嫂都有去。Taffy 好受男客歡迎,談吐大方,而且一啲都唔揀擇,基本上每位男客佢都有剔。以佢嘅表現,相信好快可以搵到另一半。Taffy 唔係性格差,又唔係揀擇,究竟有咩問題,令到佢識唔到男朋友?

一個月後,Taffy 去晒所有speed dating,都冇再搵阿嫂。咁阿嫂就諗住算啦,可能Taffy 真係平日識唔到男朋友,先搵佢地呢。哈哈,過多一個月,佢就知唔係咁簡單啦。

一個月後,有一位男客搵阿嫂,叫佢小心啲Taffy,話條女唔係嚟搵男朋友的。點解?因為呢一個世界好細,嗰位男客同Taffy 有共同朋友,啲共同朋友話佢知,Taffy 一早有一位拍拖三年嘅男朋友,最近仲計劃結婚𠻹。嗰位男客知道後,本身怒火中燒,想唱衰Taffy 收兵,但又唔想畀人知佢去speed dating,就冇講出去。於是,佢話畀阿嫂知,等阿嫂小心一下啦。

阿嫂即刻睇返Taffy 個profile,搵下蛛絲馬跡。原來,Taffy 係財務顧問,即係保險女呀。每次speed dating,佢只係剔啲冇乜自信、內向嘅男客,而型格、醒目嘅男客反而冇剔。阿嫂估計,Taffy 去speed dating 係識一啲高收入,但係毒毒哋、對靚女冇乜抵抗力嘅男客,然後氹佢地買plan。

提出假設後,阿嫂再打咗兩個電話。第一個電話,係打畀一位極有可能中伏嘅男客,試探下佢有冇幫Taffy 買plan。頂,呢位男客真係幫咗Taffy 買plan!第二個電話,係打畀一位行家,問下佢有冇遇過Taffy 呢位客人。

「Taffy Sham 呀嘛,屌,見過啦!成日join speed dating 搵客sell 單,我地同其他公司都blacklist 咗佢!」哦!怪唔知得Taffy要搵阿嫂間細公司啦,因為已經俾大公司blacklist 晒!兩個月後,Taffy 唔知係咪又想搵客,再次搵阿嫂玩speed dating,不過阿嫂都blacklist 咗佢嚕。

「頂⋯⋯估唔到,而家sell 單都有咁多方法,我真係要增值下自己先得⋯⋯」聽到呢道,我都有啲慚愧。

「係呀,執下個look 啦你,可能可以溝到闊太搵到食呢,哈哈!」David 拍一拍我膊頭,笑住咁講。

 

【保險界那些事】

日常分享 Instagram: https://instagram.com/bohimlo

 

作者:Bohimlo

Bohimlo
90後保險佬,細個想開玩具店,送玩具畀小朋友,大個去咗做保險,同客人嘅仔女買儲蓄保險,等小朋友有錢買玩具。 日常分享 Instagram: https://instagram.com/bohimlo

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 188114
Date: 2018-12-08 09:03:16
Generated at: 2020-08-13 04:12:02
Permalink: https://www.vjmedia.com.hk/articles/2018/12/08/188114/【保險界那些事】去speed-dating-溝客的保險女