最近，大學師妹Esther同我分享咗個故事，話有一位保險界新人打客人。經過上次同David嘅對話，我明白要增值自己， 增廣見聞。於是，我決定寫低呢個故事，日後引以為鑑——
話說有一位後生仔，叫佢做K先啦，本來係一名入境事務助理員嚟嘅，因為頂唔順政府工太無聊、人工加得慢，就跳返出嚟打工，決定做保險搵大錢。嗱，咁佢又冇揀錯喎，保險你做得好嘅，真係可以搵到好多錢，分分鐘高過政務主任。但係，大前提係你要有客，而且啲客又肯畀錢你先得。佢錯就錯在，諗得太美好啦。
K一考完個牌，就瘋狂搵客，主要係搵返家人、前同事、朋友啦。第一個月，佢父母幫佢開咗張大單，令佢有豐厚嘅收入。
「我唔怕話你知呀，我入行一星期，今個月人工已經高過之前做IA啦。」同Esther食糖水嗰陣，K好開心咁話。
當時Esther心諗，車你啲人工咪又係父母道嚟，就話啦：「恭喜你，咁之後你點搵其他客人？」
「好易唧，我有幾個朋友已經答應咗幫我簽，到時我再出去搵啲客，都夠洗啦，今年一定上到MDRT。」K好有信心，再挨近Esther話：「最好你都支持下我啦。」
「哈，我咪話咗我已經有一位好好嘅agent（我呀我呀）囉，我搵佢買就得啦。」Esther直接拒絕。
「屌，本身有agent根本唔係一個拒絕我嘅理由，如果你有心支持我，就會幫我買多份啦！」K畀說話Esther聽。咁Esther都冇理佢，快快脆埋單走人。
「屌，我同呢條友老蘭識㗎，佢憑咩要我支持佢？」Esther同我講。
一個月後，Esther再次見返K，K就開始吐苦水啦：「屌，班仆街，次次約佢地都放我飛機，我一日約六個人呀，有五個都會放我飛機，淨低嗰一個聽完都唔肯買！嘥我時間！」
「喂⋯⋯咁你做得呢行，又要向朋友埋手，係預咗俾佢地放飛機，甚至同你疏遠㗎啦⋯⋯」我有啲悲哀咁話。
「係呀，我都係咁同佢講！點知佢都係發老脾！」Esther話。
「屌！佢地答應過會撐我㗎嘛！」K當時就咁發老脾啦。
「嘩，好在你冇答應過佢唧，哈哈！」我笑言。
後來，Esther怕咗K，都冇乜點同佢見面。但Esther都有見下K嘅朋友，就八卦下K撈成點啦。
「屌，條友真係好唔適合做保險。」其中一位朋友咁講：「佢約親人都係去McDonald道傾單，好少少都係大學canteen，一嚟到開場白都冇兩句，直接叫人買佢張單，係咁話你搵唔夠錢、身子虛弱、份工危險，踩到你嘅人生一文不值咁，再叫你買多份保障。大佬呀，我同其他agent傾，佢地至少請我去酒店食下buffet，同我傾下計，先再傾張單呀，我買佢個service都抵啦。我唔係要畀錢一個人同我去McDonald，淨係聽佢踩我咁折墮呀？」
「但係，佢話你答應過佢，會幫佢買單㗎喎？」Esther問。
「屌，我係答應過佢買。我都係諗住買份儲蓄唧，點知佢就叫我一次過買埋人壽、醫療同危疾，仲有啲唔知咩基金，我真係買嘅，每個月拎晒份糧去供都唔掂！」嗰位朋友話。
「咁，你求其幫佢買份囉。」
「屌，」另一位朋友插口：「我有，我真係有求其幫佢買一份！點知呢？我話要一份，簽單嗰日佢竟然帶三份嚟，仲要我即時簽咗佢。我頂唔順就話佢啦：『屌！我都話淨係買一份咯，點解你死係要賺多我幾千唧？』佢嬲起上嚟竟然打我！條友痴線㗎，我真係未見過做保險做到咁仆街。」終於，Esther明白點解冇人幫K買保險啦。
「對唔住呀Esther⋯⋯」我話。
「吓？咩事？」Esther不解。
「我冇帶你去酒店食buffet⋯⋯」我望住我地而家身處嘅Table 18，唔好意思咁講。
「哈哈哈哈哈哈哈哈，」Esther笑住：「屌，傻啦，到你做到COT時，我地再去半島食tea！」
「好！」
在酒吧溝女再呃單的保險佬
原來保險經紀會精神分裂
去speed dating 溝客的保險女
日常分享 Instagram: https://instagram.com/bohimlo
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2018年12月9日
