【嗚吧軼事】公司唔會同你講嘅經營現況

我係一個兼職司機，不過就唔係的士司機。總之就係有個台個種啦（你明嘅）。我投稿嘅目的係想分享吓做司機期間嘅軼事。既然今次係第一次，不如就用問答嘅方式做個開始啦。

問：其實兼職司機好唔好搵？

答：好唔好搵其實就見仁見智。當然，個台會同你講「每月幾銀不是夢」。但係，由於架車係你自己擁有，基本上燃油、維修、保養、保險、諸如此類都係自己一手包辦。其實七除八扣之下，搵嘅其實唔算好多。再者，個台仲會每程車抽四分之一嘅車費作為「平台費用」（即係抽水）。其實每程車賬面所得分分鐘仲少過的士。

問：唔係咁好搵咁你又做？

答：對唔住，係我天真同傻。其實以前做乘客嘅時候聽啲師兄講係搵到，係好做。所以我就落左搭。咁當然啦，我做之前都有諗過嘅，不過有啲嘢齋諗冇用，做過先知。就我個人而言，養到車之餘仲有多少落袋就算係咁啦。而且，時間彈性好多，基本上我鐘意就開，唔鐘意就收。如果換轉好似揸的士咁，你俾得錢租得車仲要跟更數，唔通你租車個段時間走去瞓覺咩，係咪？

問：咁你會唔會叫人加入呢個行列？

答：唔會。由於個台成日用「每月幾銀不是夢」同介紹獎金（即你介紹人做就有定額獎金）。個個都錯覺地覺得好好搵，或者想攞介紹獎金。基本上司機人數會幾何級數上升。相反，客就屬於數字級數增長。都係可能朋友間口耳相傳先慢慢會加入叫車行列。乘客量增長滿足唔到司機人數增長。無謂叫人黎爭食。再者，有啲問題到而家都未解決，自己決定要做就自己負責返，不過鼓勵人哋做就冇謂啦⋯⋯

今次就講住咁多先，如果大家有嘢想問，睇吓會唔會再寫吓問答。黎緊我會不定時分享吓揸車期間遇到嘅事或者現象。希望大家多多支持，等我有動力寫落去。

作者：車上人間

一個男人一架車，見盡香港人和事。

閱讀後覺得好，請多多讚好及分享～：）