中美大戰——中國政府關稅收入大增,或成最大贏家

 

文友六子山出咗張〈中美關稅收入對比圖〉,佢話「中美貿易戰,美國好似好兇恨,但望望貿易戰開始後中美那一國收得最多關稅……」

中美貿易戰,美國好似好兇恨,但望望貿易戰開始後中美那一國收得最多關稅……原來係中國。https://twitter.com/sentimentrader/status/1068250532056309770

六子山發佈於 2018 年 12 月 9 日 星期日

 

好明顯,貿易戰開打之後,強國政府收嘅關稅係十級跳,由3.X Billion 美金,升到32.26 B。美帝呢,就由3.X B升到5.55 B,增長得六成左右。侵侵呢個Tariff man 係二流架,大大先至係冧巴溫Tariff man 呀!

中國政府係最大贏家,直接嘅收入係多咗30B喎,肥過肥仔水喇!

有讀者問嘅錢喺邊度嚟,無錯,咪就係中國嘅入口商囉,如果佢地將呢筆多交咗嘅關稅轉嫁俾消費者,就消費者俾錢,佢地硬食就即係入口商自己荷包出錢,無論如何,都係中國人多交咗稅俾中央人民政府。呢排由中央到地方都狂搵稅源,由冰冰到戰狼都俾人查稅。30B美金喎,簡直係天降橫財。如果要在國內加稅,有幾大嘅阻力?有幾多反對聲音?依家在報復侵侵嘅愛國旗幟下,中國人民交足30B美金嘅額外稅款,直入中央財政。大大出手創收兩三個月就咁嘅成績,一個人都無拉,絕無侵犯人權,紅色人民大讚亮劍之威武,贏錢又贏面呀!

有啲企業因為貿易戰加關稅做唔到生意喎,執笠裁員喎,咁點計先。大家似乎睇唔到貿易戰一石嘅第二鳥,就係國進民退嘅大戰略又進一大步。國企嘅損失可以由中央補貼返,30B入面攞返一半出嚟,都仲有15B呀。國企一定唔會執笠裁員,呢排有新聞話唔裁員嘅公司,國家退還「失業保險供款」,即係退稅喇,又係一筆補貼。仲有各種名目嘅補貼,保證國企唔會蝕錢。加埋國有銀行嘅全力支持,放水擴張都仲得。呢次貿易戰,民企當然要身先士卒交多啲關稅以示愛國喇。交唔起關稅嘅好明顯係「過剩產能」,理當淘汰,呢啲民企唔死又點將市場讓俾國企?啲民企唔經營困難,又點會將好地地嘅生意賤賣俾國企?當年毛主席時代要武鬥先搞得到嘅公私合營,化私為公,依家一滴血都無流就全速推進呀。

侵侵先至係第二贏家,佢好嘢呀,睇準中國唔從美國進口就根本買唔到嘢,由得大大報復,美國出口有無影響?睇中國嘅關稅收入就知無咩影響喇,唔怪佢地喺得阿根廷食飯食得咁開心,大大報答侵侵,仲應承咗買多啲美帝好貨添。天朝貿易,一定係施惠蠻夷,錢花得高興高興。

侵侵狂抽關稅嘅直接收入就無大大咁威喇,因為美企在中國買開嘅嘢大部份其實全世界都可以生產,企業要慳錢,轉去越南、印度、孟加拉……邊度都得喇,要避過關稅真係話咁易。咁點解侵侵都仲收多咗錢?因為有啲訂單晨早落咗無得改,要硬食。另外,早排中國又加大咗出口退稅,又有啲訂單可能係幫襯國企,佢地有國家補貼番,咪可以交稅俾侵侵之後仍然有錢賺囉。反正,殺頭生意有人做,蝕本生意無人做,有人交稅入貨即係有利可圖,侵侵就2B美金袋袋平安。

二十億美金嘅關稅對美帝天文數字嘅消費額嚟計真係九牛一毛都不如,好多朋友喺FB貼火雞慶祝感恩節,睇嚟聖誕都一樣買買買好Happy。美國消費者好似咩都感受唔到,佢地根本唔會理啲產品係咪Made in China,有貨啱價錢就買架喇。除咗股市跌咗好多(股市升跌關唔關貿易戰事?木宰羊),貿易戰對美國社會嘅Impact 真係睇唔到,到依家都未見到美國廣泛嘅示威抗議物價飛漲。大家睇下法國,汽油加稅搞到巴黎著晒火,差啲連凱旋門都燒埋。西方社會嘅一般人對生活成本好敏感,你搞到佢一定行使佢地嘅人權,出嚟燒車軚嘅真示威。和理非非嗰啲唔叫示威,叫示弱,好唔好?

中美貿易戰呢個回合,中國政府或者係最大贏家,贏錢又贏面。美帝政府直接贏嘅錢少啲,但又得到大大嘅新訂單,或者係第二贏家。美國消費者無贏無輸無感覺,可能連賭枱都無行埋去。中國人民輸大錢,但贏番啖氣,又算打個和Super。

開歷史之先河,戰爭各方全贏或打和,諾貝爾真係要喺棺材跳出嚟俾兩位大統領頒返個和平獎。

 

【專題:產經輔仁】

 

作者:白恩樑

好讀書,不求甚解,每有會意,便欣然忘食。(陶潛《五柳先生傳》) 為天地立心、為生民立命、為往聖繼絕學、為萬世開太平。(張載) 子曰:「飯疏食,飲水,曲肱而枕之,樂亦在其中矣。不義而富且貴,於我如浮雲。」(論語.述而) 創業要準備一桶血,而最大的創業就是打天下。(王強,《亞洲週刊》訪問2009)

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 188225
Date: 2018-12-11 18:26:42
Generated at: 2020-10-31 19:11:55
Permalink: https://www.vjmedia.com.hk/articles/2018/12/11/188225/中美大戰-中國政府關稅收入大增,或成最大贏