【保險界那些事】私吞客人錢嘅保險經紀

 

(photo via cc Flickr user Flazingo Photos)

 

今日,我想分享一單保險界嘅詐騙案,提醒各位朋友,唔好過分信任你嘅經紀。

客人呃保險我就聽得多,估唔到保險佬呃客人都有,真係好恐怖。呢個故事,係師妹Esther話我知嘅。

話說,Esther有位朋友叫Y,前年生咗一個仔,就買咗幾份保險畀個仔啦,佢係向一位叫Alan嘅經紀買嘅。

Alan係一位風光嘅經紀,每次握手費都二三百萬,又自己開公司,令Y相信佢係一位好嘅經紀,如果唔係,邊有咁多人畀錢佢賺啊。於是,Y就買咗幾份巨額保險畀個仔啦。當時嘅Y初為人母,好多嘢都要學習,十分忙亂,所以冇特別跟進到保險嘅事,簽個名、出張支票就算,日後都係以WhatsApp同Alan聯絡。

後來,Y個仔真係有病入醫院,Y帶咗佢去私院求醫,仲要晒最好嘅服務。

「當時啊,我都有去探佢個仔㗎,住半私家病房,正!」Esther話。因為Y係買「晉領醫療保障標準計劃」,呢個ManuMaster Healthcare係高級啲,可以住半私家病房嘅。

不過,Y個仔出院之後,就出事了。Y找咗醫院條數之後,就搵Alan向保險公司claim錢啦。點知條友玩失蹤,電話唔聽、WhatsApp唔覆,Y又趕住找卡數,唯有直接打去理賠部門,叫佢地處理。

「Y小姐,我已經依照你提供嘅資料去搵,但我真係搵唔到你嘅保單紀錄⋯⋯」理賠部門嘅職員回答。

頂——Y已經大概估到乜嘢事,就係Alan一直冇幫佢開單,而係私吞咗佢嘅保費。依家Y真係要claim錢啦,Alan當然潛晒水啦。

「頂,點會咁蠢㗎,買保險一定會寄返張單畀你㗎喎, Y當時收唔到,冇起疑心㗎咩?」我即時話。

「我都有咁鬧佢啊,佢都話自己好蠢,因為太多事要處理,又過分信任Alan,冇特別留意。」Esther話:「後來,Y冇即時揭發Alan,而係偷偷地起咗佢個底,先發現佢係一個空心倌,用個人名義請秘書,唔同人簽約,之後就側側膊唔出糧。佢自己間間公司呀,只係空殼公司!」

「咁之後點算?」我好心急咁追問Esther。

「Y整合好所有證據之後,發出最後通牒畀Alan同另一位同謀——佢太太,但兩條友都冇回應。Y就報警,告佢詐騙。」

後來,警方開始有行動,公司亦炒咗Alan 。 Alan先喊晒口咁搵Y,話可以賠償佢所有損失,求佢唔好咁做,自己仲有個仔要養,Y本身想鬧佢:「咁你又玩我個仔?」不過,對住呢種人,鬧嚟都嘥氣,Y都係冇理到佢。一年後,Alan本身唔願意賠錢,但告到上刑事,佢同佢老婆都要坐監。所以,佢賠咗一百萬作庭外和解,件事先至完。

「嘩,怪唔知得佢可以扮風光啦,原來靠呃錢。」我話:「不過都好,等咗一年,多咗八十萬喎。」

「我都有咁同Y講啊,但佢話如果可以揀,佢都唔想呢件事發生,因為當時佢一個人打兩份工,自己找醫藥費,真係好辛苦。同埋,佢之後真係無辦法再信任保險經紀。」Esther話。

頂,又一個影衰保險界嘅例子。

 

【保險界那些事】

在酒吧溝女再呃單的保險佬
原來保險經紀會精神分裂
去speed dating 溝客的保險女
打客人嘅保險界新人

日常分享 Instagram: https://instagram.com/bohimlo

 

作者:Bohimlo

Bohimlo
90後保險佬,細個想開玩具店,送玩具畀小朋友,大個去咗做保險,同客人嘅仔女買儲蓄保險,等小朋友有錢買玩具。 日常分享 Instagram: https://instagram.com/bohimlo

閱讀後覺得好,請多多讚好及分享~:)

其他熱門文章

  • 港人學樂器小心被騙財——大提琴掠水記 by 莊公公
    二手琴市場好細,賣出去唔容易,價錢好低,香港地寸金尺土,仲要佔地方,即係擺明被勒索,如果唔係冇好日子過,以後上親堂有排煩。…
  • 【PR】開放世界獸人 x 功夫動作 RPG《BIOMUTANT》今月推出多平台對應 by VJGamer
      Epicsoft(Hong Kong)Limited 今日宣佈,由 Experiment 101 […]…
  • 鑽戒 by 藍兼併
    程子晴嫁給富商翁恭時只有24歲,而翁恭比她年長26年,二人的婚禮在五星級酒店舉行,城中名人富豪紛紛到賀,這段婚姻被外界視為父女戀,而程子晴承受着貪財嫁富翁的惡名。…
  • 朋友,並唔係要嚟搵笨㗎! by 小盛女
    「未諗㗎,都係落吓FB、Google廣告果啲,我畀啲相同價錢你,你幫我執吖。」Grace說。 「你係想我幫你整?你話我知總共要整幾多樣,幾時要完成,我再quote個價畀你啦。」我說。 「唔使咁大陣象!我哋咁熟,想你幫吓手咋,好簡單啫,你…
  • 如何成為護士?(包括登記護士與註冊護士) by Su子
    呢篇野係寫俾考完DSE,有志投身護理界既所有同學。…
  • 正常生活 by 健吾
    當我看到新聞評論,大家都在一面倒的討論感染者的「私德」不檢,導致大家連假都沒了。這樣子的狀況,似曾相識。就好像是,當愛滋病流行之時,「普通人」、「未感染者」把所有同性戀者的性慾當成是罪,只要你有「性行為」,你就是錯。…
歡迎讚好我們的facebook page,免費資訊源源送上。

文章資訊

ID: 188223
Date: 2018-12-12 03:36:16
Generated at: 2021-05-19 07:00:57
Permalink: https://www.vjmedia.com.hk/articles/2018/12/12/188223/【保險界那些事】私吞客人錢嘅保險經紀