【嗚巴軼事】個台食司機幾多錢？手法真係層出不窮. . . . . .

好開心繼續分享兼職司機嘅經歷。上回提過所謂「平台費用」（即係成程車抽你四份之一車資），如果你以為個台純賺呢個平台費用，少年你實在太年輕了。除左同司機對分之外，個台賺錢手法真係層出不窮。

第一，個台會收個客預約費用。簡單講，你叫得車。只要過左頭三分鐘，無論你正式上左車開始行程，還是臨時取消（彈鐘）。個台都會收你五蚊預約費用。不過呢個已經算係光明正大。以下落黎會令各位讀者不安，大家自行斟酌要唔要睇落去。

第二，個台會食個客夾棍。其實佢係利用左司機同乘客之間嘅資訊不對流通黎進行。意思即係，乘客叫車嘅時候會知道個價錢，但司機係要完成行程後，再檢視有關記錄後才知成程車嘅費用（抽水前）。於是個台就好安心咁報大少少個車費，同司機講就係原來（可能報細左）嘅價錢。點解我知？因為我都會問個客囉。事緣有一次，我載個客由紅磡到東涌，期間個客當然又問吓我呢份兼層好唔好做啦。講到個程車個車費囉，咁我咪問個客程車幾錢囉。咁個客又好好人咁答左我。咁程車完左咪睇吓到底程車抽水前又係幾錢，唔睇由自可，一睇把幾火，個客同我講嘅車資比起實際嘅車資多幾十蚊。於是個台就咁就食左個客一筆喇⋯⋯

第三，隨時改變「加乘」黎食價。所謂「加乘」即是係高需求情況下車資增加的意思，通常以1.x黎表示。話說今年其中一個大颱風過後，筆者又出去賺吓加乘。話說有個預約加乘達3.5倍，諗住今次肥過肥仔水，個客仲話個台收佢成五百大洋，諗住扣埋都應該唔錯啦。點知完成之黎睇返，得返一半都冇，再睇一睇，程車得2.5倍加乘。於是筆者膽粗粗透過個app度查問到一下啦，個台覆我就話接個陣係2.5倍加乘，冇計錯你㗎。即係點？即係佢收個客3.5倍嘅錢，俾就只係俾2.5倍你。而你接單嘅時候係揸緊車，基本上cap圖就冇可能。食完你都冇仇報。

話又講返轉頭，正所謂「一個願打一個願捱」。正如你返工一樣，合約夠講明返工時間啦，咪又係OT去到八九點（起碼）⋯⋯唔通你又唔做咩⋯⋯

作者：車上人間

一個男人一架車，見盡香港人和事。

閱讀後覺得好，請多多讚好及分享～：）