摟屌

文教 / 最新文章綜覽

 

當年電結他出現,唔係,係當結他慢慢成為現代各音樂(如民謠、搖滾、金屬等)嘅主力時,其實係有一個「借用」同「轉化」嘅過程。我意思係話,結他本身係由西班牙古典結他發展出嚟,古典結他,或者西班牙結他,係有佢自己嘅手法、技巧同美學體系,不過喺音樂發展中慢慢衍生出唔同流派同技巧,最後令結他呢樣嘢嘅定義擴闊咗,內涵擴闊咗。到電結他出現,其實亦係類似,一開始唔少人都唔太接受,尤其是用來玩民謠的話好多人都會覺得怪,或者「唔成體統」,但電結他到今日嘅覆蓋率同發展,我相信成績係有目共睹嘅。

不過對於其他樂器嚟講,我相信大部份都好難接受一啲比較新嘅手法。例如好多人唔接受有五條絃嘅小提琴,或者用電子拾音器去玩原音樂器等。又又或者唔接受「唔正統」嘅演奏手法。據朋友講,印度嘅小提琴就發展出「印式小提琴」,技法風格同古典小提琴好唔同,已經自成體系。但我絕對明白喺主流樂器技巧流派嘅人會對新式玩法感到唔太自在,因為樂器本身係一種文化積累嚟,手法技巧到玩啲咩音樂,其實息息相關又有晒歷史,你中間當玩具玩玩到咁上下,多少有褻瀆之嫌。即係假如你將部古琴當結他彈,好多人都接受唔到(莫講話其實古琴界別內用鋼弦或絲弦都已經有好大分歧)。又或者玩竹笛唔講南北派,玩胡琴唔講陝秦江南廣東咁,咁將樂器「還原」做「一件會發聲嘅嘢」,好多人都會覺得係一種降格。

但係我哋比照返第一段講嘅結他歷史,又似乎不得不承認,「鳩玩」係有佢嘅價值,「鳩玩」係一種可以推廣同擴闊樂器表現力嘅手段。當中究竟點樣劃分界線?其實真係人言人殊,個個答案唔同。不過,對於民族音樂來講(即使古典結他或西班牙結他都包括在內),其實呢個「擴闊」過程係會對佢哋原有一套係輸蝕嘅,因為現代社會嘅美學要求,技術要求會蠶食咗佢哋原有果套比較內斂嘅一套,淨係音量已經無得比啦。

而另一個有趣嘅現象,似乎「除結他以外」嘅樂器,除非被人誤解為「玩具」(其實無一種樂器係「細路玩具」,每一種樂器都應該受尊重),否則都會有「正統手法」,而艱苦學習「正統手法」嘅人就更加會對「拎來乜都試下」嘅玩法更加輕視甚至鄙視。

 

作者:林非

離經,不欲縛於經書舊說,欲自成一家自成一經。八十後,以追求人生自由之道為己任。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 188273
Date: 2018-12-13 10:11:07
Generated at: 2020-08-15 07:28:09
Permalink: https://www.vjmedia.com.hk/articles/2018/12/13/188273/摟屌