【中史老師不會亦不懂告訴你的事】太史公爆寫作《五帝本紀》嘅秘密

 

 

再講多次,讀《史記》同讀《聖經》一樣,要讀原文。

原文在此︰https://ctext.org/shiji/wu-di-ben-ji/zh 

《五帝本紀》最後一段係太史公講自己嘅說話︰

太史公曰:學者多稱五帝,尚矣。然尚書獨載堯以來;而百家言黃帝,其文不雅馴,薦紳先生難言之。孔子所傳宰予問五帝德及帝系姓,儒者或不傳。余嘗西至空桐,北過涿鹿,東漸於海,南浮江淮矣,至長老皆各往往稱黃帝、堯、舜之處,風教固殊焉,總之不離古文者近是。予觀春秋、國語,其發明五帝德、帝系姓章矣,顧弟弗深考,其所表見皆不虛。書缺有閒矣,其軼乃時時見於他說。非好學深思,心知其意,固難為淺見寡聞道也。余并論次,擇其言尤雅者,故著為本紀書首。

點解中史科唔直接讀廿四史嘅原文?因為太史公寫嘢好鬼蠱惑,記完一大段歷史,最後一段就講自己嘅嘢,宜家啲老師好難接招。

 

上面嗰段文言文係咪好深?唔係吖,我試下理解太史公嘅說話。

 

太史公曰:學者多稱五帝,尚矣。然尚書獨載堯以來;而百家言黃帝,其文不雅馴,薦紳先生難言之。孔子所傳宰予問五帝德及帝系姓,儒者或不傳。

班「學者」人人講五帝,話係《尚書》講嘅,《尚書》係古代公文匯編,夠權威喇,《尚書》話五帝就五帝。太史公就踢第一腳︰喂,《尚書》嘅文獻係由堯開始喎!唔夾喎!百家講嘅黃帝,又「其文不雅馴」喎,又係好多唔夾嘅說法喎。佢去問薦紳先生(先生即係老師喇)都話「難言之」,大老師都木宰羊喎!孔子嘅傳記話宰予問過〈五帝德〉同〈帝系姓〉兩篇古文,「儒者或不傳」即係話唔好亂咁傳講,即係孔子都唔敢話一定啱,唔好亂嚟。

 

余嘗西至空桐,北過涿鹿,東漸於海,南浮江淮矣,至長老皆各往往稱黃帝、堯、舜之處,風教固殊焉,總之不離古文者近是。

太史公自己去過好多地多考查,又真係四圍嘅長老都講佢地嗰度有黃帝、堯、舜嘅足跡,但係各個地方嘅風土人情教化又好唔同,佢地講嘅又同古文講嘅好唔同。呢句「不離古文者近是」即係連距離近都稱不上。嘩,咁古文啱定長老嘅口述歷史啱多啲?

 

予觀春秋、國語,其發明五帝德、帝系姓章矣,顧弟弗深考,其所表見皆不虛。書缺有閒矣,其軼乃時時見於他說。非好學深思,心知其意,固難為淺見寡聞道也。余并論次,擇其言尤雅者,故著為本紀書首。

咁點算呀?太史公就認為《春秋》、《國語》已經「發明」咗〈五帝德〉同〈帝系姓〉兩篇古文(係「發明」,即係可能係老作架,太史公寫「發明」一定有啲嘢),不過太史公認細佬,唔去深入去考究(無講唔敢考定廢事考),淨係話呢啲料「不虛」。書,係專指《尚書》定一堆古書,我唔敢亂解,無論係《尚書》定係太史公面前嘅古書,呢本「書」就見一截唔見一截,唔完整嘅,嗰啲唔見咗嘅部份又成日喺其他論述被引用轉述。(太史公暗示呢啲料可以用但唔可以盡信)。

所以,太史公繼續話︰如果唔係「好學深思,心知其意」,一定好難用自己嘅淺見、寡聞去講呢啲故仔。佢呢,聽咗好多五帝嘅故事,好似砌圖咁拼出五帝嘅事跡,但「擇其言尤雅者」,即係揀佢認為OK嘅內容,就寫咗上面《五帝本紀》嘅正文,成為整套《史記》嘅第一章。

 

咁即係話《五帝本紀》係吹水流料、道聽途說嚟?仲信得過咩?咁樣嘅,我地信太史公佢聽咗咁多嘢、讀咗咁多文獻,信埋佢嘅專業判斷。因為大家信太史公,《史記》先至可以作為最基本嘅、共同嘅歷史,成為廿四史之首。如果唔信太史公,當然可以深入去考古發掘,自成一家,但係咁多年來,都無咩聽過有人推翻過《史記》嘅權威,相反,證實嘅野越嚟越多。對一般讀者而言,要有嘢喺手,太史公嘅料最信得過。

講真,唔信太史公,仲信得邊個?

 

作者:白恩樑

好讀書,不求甚解,每有會意,便欣然忘食。(陶潛《五柳先生傳》) 為天地立心、為生民立命、為往聖繼絕學、為萬世開太平。(張載) 子曰:「飯疏食,飲水,曲肱而枕之,樂亦在其中矣。不義而富且貴,於我如浮雲。」(論語.述而) 創業要準備一桶血,而最大的創業就是打天下。(王強,《亞洲週刊》訪問2009)

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 188360
Date: 2018-12-16 04:47:03
Generated at: 2020-10-31 18:55:59
Permalink: https://www.vjmedia.com.hk/articles/2018/12/16/188360/【中史老師不會亦不懂告訴你的事】太史公爆寫作