【嗚巴軼事】正宗港客——確認、取消、確認、取消，你總會chok 到架Tesla！

每次叫車，都會有唔同嘅驚喜。

由於每次叫車都係由平台派單，所以好多時每次都會叫到唔同車，由「韓仔早晨號」到「交流電之父」都有機會搭得到。由於一分派司機嘅時候，個客已經知道係咩牌子型號嘅車黎接佢哋，而且，相同嘅價錢，有啲人可能就被分派「韓仔早晨號」，有啲就派到「交流電之父」。以香港人性格，「點解我俾一樣錢，點解人哋就美國靚車，我就韓國車？」（另類「魚蛋論」），於是就出現左「chok 車」嘅現象。

咩叫「chok車」？讀者有打機的話就會知道咩叫「chok 招」、「chok 關」，基本上「chok 車」就係差唔多嘅嘢。玩法好簡單，篤好目的地，揀好服務類型，再撳確認。等到派到司機俾你，你只要撳一下取消，重覆返揀目的地，你就可以再chok一次。（記得三分鐘內取消啊，唔係盛惠20大洋）。當然呢樣玩法唔係俾你「無限復活」啦！你玩得4、5次，個台就會暫停你10分鐘冇得叫車。

筆者都試過俾客「chok 車」，同一個客可以一分鐘內 chok左四、五次車（點解筆者知，兩次就可能唔同客啫，三次以上多數係同一個人啦），由於筆者係有理冇理接左張單先睇去邊度接，一遇呢種情況，筆者好想問「你玩嘢呀？我仲要唔要接你單好？」所以，筆者同一眾師兄師姐一樣，最憎就係啲人係度「chok 車」。另外，個台係會計司機接單率同完成率，前者即係俾單你，你接幾多張；後者係你車完幾多張接左嘅單。呢兩個率，輕則影響個啲獎金計劃是否合格領取，重則可以影響到人被停機冇得玩。再者，將心比心，你唔鐘意人哋揀客，司機都唔鐘意俾人揀。

將心比心？香港人喎⋯⋯你話呢！

【嗚巴軼事】

作者：車上人間

一個男人一架車，見盡香港人和事。

閱讀後覺得好，請多多讚好及分享～：）