【傷風感冒唔一定吽得好】流左幾日黃鼻涕,小心變鼻竇炎

 

(終於)踏入冬季,前排筆者同好多人一樣中左招,突然開始係咁咳、喉嚨痛、鼻塞同流鼻水。初頭諗住不過普通傷風感冒,一年都唔知中幾多次,又無發燒,啫係唔驚係流感啦,咪又係食幾粒感冒藥,飲多啲水,三兩日就會好返。於是除左一日啪兩次成藥,戒下口,就冇咩點再理。

如是者到第三日,喉嚨冇再痛,取而代之係開始不斷咁擤杰撻撻既黃鼻涕。恃住自己有丁屎咁多醫學知識,知道今次應該係細菌感染,但係覺得是藥三分毒,免得過都唔想食咁多藥,更加唔想食抗生素會為細菌發展抗藥性加一分力,所以相信始終都係要靠自己身體免疫系統去打呢場仗。加上日日返工,真係得閒死唔得閒病,邊有咁多時間睇醫生呢?結果成藥都冇繼續食,淨係每日飲維他命C沖劑,就滿懷好快會好返既希望,然後keep住每半個鐘就擤一次鼻涕,又長期鼻塞要用口抖氣,所以夜晚要戴住口罩訓覺(會冇咁乾)。

放置play去到第七日,眼見黃鼻涕流到第五日都未停,已經覺得唔對路,呢個時候已經開始想睇醫生,但係又撞正全日有野做/睇開嗰間診所突然早左閂門/返工好忙行唔開呢啲極為濕碎既原因,又吽多左兩日。去到第八日,上面棚牙開始陰陰痛,咁岩嗰個位又真係有隻未剝既智慧齒,只覺得自己差不多時候要去剝牙。去到第九日,開始每行一步路啲牙就更加痛,痛到出塊面度,但見啲鼻涕好似停停地,以為自己就好返之際,夜晚食飯擤一擤鼻,就擤左啲黃咁咁好似果jam咁既野出黎—

個鼻流緊既已經唔係鼻涕,係膿……

呢個時候終於識驚,衝左去睇夜診,確診為急性鼻竇炎。結果都係要食抗生素,走唔甩。

今次先知原來鼻竇炎可以係一樣冇咩痛感既野,亦可以冇發燒,所以先咁容易令自己輕視。下次呢啲細菌感染既野,都係乖乖地早幾日去睇醫生,唔洗浪費咁多紙巾、口罩,同埋錢(夜診好銀貴,完全係幫醫生供樓)。在此奉勸各位,保重身體,病向淺中醫。

 

作者:自田丌

自田丌
夢想係養一隻金毛尋回犬同一隻臘腸狗。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 188401
Date: 2018-12-18 04:47:14
Generated at: 2019-03-22 15:12:24
Permalink: https://www.vjmedia.com.hk/articles/2018/12/18/188401/【傷風感冒唔一定吽得好】流左幾日黃鼻涕,小心