【嗚巴軼事】靜靜雞話你知，其實司機係被強制對乘客評分，低分嘅乘客係會. . .

為左維持服務質素，個台設立左一個評分制度。當乘客坐完車之後，個台都會叫啲客俾分啲司機，五星最高，一星最低。而分數係行遞減制，即一開始所有司機都屬於最高嘅5分（星）。然後隨著行程愈多，你會被評不同分數。而最近嘅五百程車嘅平均分就係司機嘅得分。

乘客俾評分屬於自願性質，你可以完全無視唔俾分又得，是但俾分又得，認真俾分填埋意見都得。不過，你以為個台淨係俾乘客評司機分？咁就大錯特錯喇。司機都可以評乘客分㗎。即刻播返首陳百強經典先：

「莫道你在選擇人，人亦能選擇你。公平～～～」

同乘客評司機唔同，司機評乘客係強制嘅。每次行程完成後，司機除左要盪完成掣外，仲要俾分個客，計分方法同乘客俾評分係一樣。雖然司機同乘客都可以互相評分，但其實實質運作上對司機並不公平。在個台嘅標準，司機得分低過4.3分屬於低分，會係個App度出警告信俾司機，如果低過4分，係會俾個台停機，冇得玩。相反，乘客得分低過4分都冇問題，繼續正常叫車。筆者聽過最誇張個客嘅評分得2.5分，照樣可以叫車。

咁咪對司機好唔公平？係㗎。不過司機們自有應對方法。最簡單嘅，司機見乘客分低，係會「踢單」唔接。就算係接，心裡面已經有個成見，有理冇理標籤左個客做「西客」先，對個客嘅態度都會打個折扣。再其次呢，司機們會持續俾低分個客，目的係等乘客個分維持某個低位，等其他師兄師姐有所防範。

真係唔好以為做客俾個少少錢大哂，仲要覺得冇後果。分分鐘俾成村人針對緊你都唔知。不過放心，個台仲要食佣，再西嘅客都係司機受。所以，西到一個點都可以繼續叫車。

【嗚巴軼事】

作者：車上人間

一個男人一架車，見盡香港人和事。

閱讀後覺得好，請多多讚好及分享～：）