【環保撚不會告訴你】做餐廳嘅朋友話我知，佢哋自己都唔會用鋼飲管

乜嘢係 XX 撚？就係將一啲睇落非常美好嘅嘢，毫無意義咁上綱上線去執行，以為咁樣就係對個世界好。

環保撚，就係以「保護環境」、「可持續發展」、「愛護下一代」為藉口，肆意咁做無謂嘢，可能為左一己開心，可能為左呃政府資助呃捐款，我唔深究。

我只可以話你知，我識人喺餐廳做，佢哋係絕對唔會用鋼飲管。

點解？

一隻碗一隻碟一隻杯，無論你個餐廳員工幾HEA，個客一定會摸到隻吉碗碟杯有無油，一定會睇隻吉碗碟杯有無污跡，個員工無論幾咁唔情願，佢見到一隻白雪雪嘅碟，上面有一點污糟左，佢一定抹走佢，慌死經理巡場見到，慌死食客投訴到總機，你試下隻碟遞俾你嗰陣係濕滴滴唔係暖風吹乾曬，最唔西嘅客都會叫佢換過隻。

好喇，問答時間：

有一間餐廳，A檯叫緊埋單，B檯想落單，C檯啱啱走可以俾下一檯客，D檯細路喊緊，E檯投訴D檯細路喊緊，F檯碟芝士焗龍蝦漏單催緊
問：咁G檯支鋼飲管入面洗得乾唔乾淨？你估下班職員得唔得閒理？

呢個其實只係common sense。

當啲為左應付環保撚而提供鋼飲管嘅餐廳，佢同我講會用刷去清潔鋼飲管，就算嗰日心情唔好，我都唔會同佢嘈，我只會叫佢俾膠飲管，或者紙我都覺得可以接受，畢竟好少食餐飯食幾個鐘直至浸爛紙飲管。

心情好嘅話，我會話，鋼飲管要洗得乾淨，唔係用刷，係要用洗眼鏡洗假牙嘅超聲波。然而都係返去嗰個問題：餐廳入面邊個得閒用超聲波洗鋼飲管？

所以環保嘅嘢，你班環保撚唔諗執行，只係喺度用道德壓力逼食肆就範，我做客嗰陣我都顧番自己身體健康，我都會用適當力度逼食肆就範：唔該俾即棄飲管我。

想用少啲膠，你買少幾個不織布「『環保』袋」就得，兩個「『環保』袋」多膠過你成世人用嘅飲管用膠。

作者：白木乩

聽聞係總編分身，專用來出D 與總編身份不符既膠文

閱讀後覺得好，請多多讚好及分享～：）