【嗚巴軼事】今日我車左個突尼西亞少女去機場. . .

呢晚，筆者係西貢某大學接左一位非洲突尼西亞嘅女孩，同佢傾計，我對突尼西亞呢個非洲國家又多左啲認識。

呢個女仔個名叫花拉（化名），讀緊大學二年班。今次叫車係因為sem break，搭飛機返家鄉度假。一開始筆者問佢邊度黎，佢話佢係Tunisia 黎，不過筆者聽錯，聽左Indonesia⋯⋯不過佢好大愛包容，佢話其實好多香港人聽完都以為係Indonesia ，所以佢都冇咩所謂。

筆者話其自己對突尼西亞嘅認識，只係黎自於世界杯或者非洲國家杯，知道呢隊波係非洲好勁（利申：筆者唔識賭波）。花拉介紹左好多關於突尼西亞嘅嘢俾筆者聽。突尼西亞人主要講阿拉伯語，其次就係法文，英文已經叫第三語言，花拉話自己黎香港之前，只會係英文堂先講英文。所以初蒞埗到都講得麻麻，不過呢一年講多左用多左，就有進步。筆者都同佢講，自己初初入行揸車都唔識路，不過揸揸吓又慢慢熟路。

講起車，花拉話突尼西亞啲車全部都係棍波車，係冇自動波車。佢仲話，「揸自動波車邊算揸車呀，好似打機咁囉」筆者同佢講，「係呀，打住機賺錢，好爽㗎！」。花拉問筆者，「其實你鐘唔鐘意揸車㗎？」筆者當然鐘意啦，又可以周圍去，又見識到唔同嘅人和事，最重要有錢賺嘛！

雖然花拉係一個正宗非洲人，但佢嘅膚色並唔係係重慶大廈見到個啲好黑嘅黑人，反而似南洋女孩子嘅膚色。花拉就話，其實係佢哋嘅種族係相對膚色比較白，就算係熱帶草原區國家，個度嘅人嘅膚色都唔係黑色㗎。

最後，講起花拉點搭飛機返家鄉。佢話香港冇飛機直航突尼西亞，佢要先搭8個鐘頭飛機去杜拜，再等4、5粒鐘之後，轉機去突尼西亞（7個鐘）。一搭就搭左整整一日。

係度祝佢一路順風，好好享受假期啦！

（編按：各位唔好咁多幻想，張圖亂搵）

【嗚巴軼事】

作者：車上人間

一個男人一架車，見盡香港人和事。

閱讀後覺得好，請多多讚好及分享～：）