今晚,我請同事食我嘅散水飯

 

我叫阿強,今日係我喺公司做嘢嘅最後一日。

早兩日我已經買咗啲靚靚散水餅請班同事食,而佢地都講明今晚一定要同佢地食個飯,大家無所不談,一於不醉無歸咁話。我緊係冇問題啦,反正我仲有兩個星期先返工,第二日瞓到夜晚先起身都冇問題。正常嚟講散水飯應該係班同事夾份請我依個離職嘅同事食嘅,不過我已經決定咗今晚就等我請返大家。

我有咁嘅決定源於兩年前一位舊同事。

過說嗰陣我返咗一個月都未夠,已經要食依間公司第一餐散水餅。身為新仔,雖然未叫同班同事好熟,但比面派對總要參加,而且兩杯落肚大家又玩得癲啲,要熟都熟得快啲。嗰晚我地落咗去間大排檔食飯,叫咗啲餸再加幾打啤酒,飲下食下講下往事講下有邊個唔在場嘅同事要提防咁,話咁快我對依間公司嘅人事關係多少都有啲認識。餸食得七七八八,酒都比我地飲乾飲淨,依位舊同事都話差唔多埋單。正當我拎起銀包準備比錢,佢一嘢就拎咗檯面張單然後行去收銀,邊行邊話今晚依餐佢嘅。

雖然我地話應該係我地請,但佢死攬住張單唔放之下我地都唔好意思再掙,唔係就好似酒樓啲師奶咁樣衰。講完多謝,我行咗去附近食煙,冇耐佢都過埋一齊食。我同佢再講多謝,只見佢笑一笑,然後話依餐佢請係應份。

「雖然同你地相處唔係好耐,但都知道你地係肯做同心地好嘅。今晚坐喺度嘅得兩三個做咗過半年,其他人都只係早你一頭半個月咁大把。而家你地可能未Feel到,依度地獄嚟架,你地啱啱入嚟有排捱,我而家就脫苦海,依餐我唔請就衰仔啦。」

聽完佢講依返說話,我就話度度做嘢都難頂架啦,邊個返工唔係睇份糧做人。佢隨手就扔走個煙頭,臨走仲話等遲下就會明佢點解咁講。兩年後,到我做咗依間公司嘅老屎忽之一——冇錯啊,同我咁上下時間入嚟嘅都走得七七八八,新血前前後後都換咗兩三批。聽我老頂講,做到過兩年嘅人真係唔算多。

歡樂時光特別快,轉眼間已經到咗埋單嘅時候。我快佢地一步拎咗張單,然後舉手叫個姐仔埋單。佢地係咁話依餐等佢地請,我望住成班啱啱跌入火坑嘅新同事們,又諗返舊同事嘅說話。只不過我冇同佢地講返同一番說話,只係笑一笑口,講咗句唔緊要啦。

地獄咁辛苦,比佢地開心多半晚啦。

 

 

作者:毛言地

毛言地
你有多久沒去找自己的理想?搏殺一天,回到家,倒頭就睡。 無言,只因生存太累。談理想?妄想; 毛言仍言,只因理想,本就是「理應去想」 http://www.facebook.com/MaoYanDe

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 188470
Date: 2018-12-19 18:51:45
Generated at: 2022-12-09 16:54:41
Permalink: https://www.vjmedia.com.hk/articles/2018/12/19/188470/今晚,我請同事食我嘅散水飯