六十歲先一齊殉情，呢個世界仲有咩唔可以發生？

世界走到千禧後再多十九年，或你都會同意我既呢個想法係：各種各樣事情都變得陰陽怪氣。例如，小學識得既久別重逢然後六十幾歲人一齊走去殉情；又例如，離冬至一日，但香港既溫度竟然回升到攝氏廿四度，濕度更係去到百分之九十。

本來慶祝冬至，好多地方都係大節，就係因為冬至被認定係最陰最寒日照時間最短既一日。跟住就會係所謂既『一陽生』，由萬物本來沉寂，到開始浮現一線既生機，再走落去就係春天既到來，所以好多國家（尤其是亞洲地方）都會大肆慶祝一番。呢個亦令我聯想起好多北歐國家亦都會慶祝有番日照既日子係一樣既。始終光明，溫暖，都象徵左生機。尤其係已經飽歷嚴寒之後，大家都期望春回大地既一刻。

但係一個好暖既冬至，咁即係點？我地係咪仲因為一個好暖既冬至去慶祝呢？而如果當大家又已經開始認定周圍既環境只係會好似慢性中毒咁樣不斷轉差的話，冬至呢種重獲新生既象徵意義，究竟我地仲係咪值得去感到興奮呢。會唔會反而係會自欺欺人呢。當然，好多人雖然都識講見微知著，但留意到細微既野既人，其實我經驗話俾我知，唔係真係咁多。所以就算冬至黎緊三十度，大概都唔會好影響到個日常生活。反正等於對住依家個政府，你都做唔到啲乜架啦ＲＩＴＥ？

麻木可以係人其中一個最大既缺點，但你亦可以話係優點。如果唔自欺欺人，可能好多人都背負唔到咁多負能量而一下子發癲。譬如去減慢氣候變化，就係力倡環保。呢個係人人都原則上同意既。但係咪迫人全部唔用膠飲管，改用金屬，地球就會無事呢？你話唔踏出呢細步去改變其他大野更加難改，我當然明。但似乎人更想表達既其實係：大既一定唔會好做，所以小既象徵式做左當交差啦。

呢個就係偉大既習主席所講既：覺得需要改既就會改，而覺得唔應該改既就堅決唔肯改。慢性中毒，就好似食鴉片一樣，甚至係會有一種令人愉悅既快感，教人欲罷不能。就算係氣候大會有小朋友對於全國領袖義正詞嚴咁講你地係犧牲下一代？ＳＯ　ＷＨＡＴ。大家都好內疚架，係真架。但到最後，都係打份工渣。你唔係以為我一個人有力回天呀？

或者係度再打一個比喻：最近睇番多啲ＦＢ／ＩＧ，發現廣告好似感覺上比以前更多。認真咁數一數，條ＦＥＥＤ每三至四個ＰＯＳＴ，原來就有一個係ＳＰＯＮＳＯＲＥＤ　ＰＯＳＴ，即係廣告。所以一直話ＦＢ已經成為廣告雜誌係無錯架。只不過佢好貼心咁話埋俾你聽邊啲朋友都睇緊同一個廣告，而且由係都要用ＡＩ去估你對咩廣告最有興趣，等你唔好咁反感咁解。

ＦＢ話ＦＲＥＥ　ＡＮＤ　ＷＩＬＬ　ＡＬＷＡＹＳ　ＢＥ。但從呢個角度睇，ＦＢ就係歲月神偷，不斷偷緊大家既時間去灌輸一啲可能你根本無諗過想接收，但係碌碌下果陣唔覺意接觸左既信息。話免費只係金錢上。諗深一層，呢件事係可以幾監粗得黎又幾強大。但你無形中付出既野，十分巨大，所以公司先肯俾錢落ＦＢ廣告。你要花多四分一既時間去碌走個廣告，而你每睇三個ＰＯＳＴ，其實又已經硬食左一個宣傳。邊個知道咁樣日碌夜碌，你個腦俾人ＩＮＣＥＰＴ左啲乜？

唐山大地震講臨地震前，唐山飄來一層黃色既霧。大家都不明所以，又繼續生活，好似錢鋼講「人們就繼續係迷霧一樣無知咁穿行著」。人類始終有佢既習慣。拒絕大開大合，鍾意潛移默化。只要有位入到，就可以得寸進尺。真理唔緊要，最緊要呢個世界既鐵則係ＷＯＲＫ。我地就可以隨時隨地咁樣自我開脫了。估唔到冬至，都可以講到無雷公咁遠。

ＡＮＹＷＡＹ。節日既野，都唔駛太過掃興。但求平安就好。

作者：鵝鑾鼻燈塔

前高登講故人。現為廢中。努力抵抗中年危機中。FB PAGE：https://www.facebook.com/Ellan.Ou/

閱讀後覺得好，請多多讚好及分享～：）