【嗚巴軼事】特別嘅「派單」技巧——大台以為你或你架車識瞬間移動

今日筆者分享一下關於派單的事。根據個台嘅官方講法，所有車程（即係「單」）係由電腦負責配對（派單），而且係會分派俾最近個客嘅司機。

到底事實係咪真係百分百係咁？其實唔係，當然啦，試過癲起上黎，可以一接單幾十米就到，甚至「單駁單」嘅時候可以上個客一落車，下個客就即刻上車（多數係酒店上落客）。更癲更常見嘅，係派一張要用超過10分鐘車程去接客嘅單。試過一次，筆者架車係威靈頓街，個台響機叫筆者上山頂廣場接客，上山程車要成15分鐘。筆者最後取消張單，點解？上山個程要15分鐘，仲要燒油，仲要唔知個客去邊，個客過海都還好，叫做可以執到多少，如果個客純粹係想落返山，個吓真係好想好似電影「黑社會」入面嘅梁家輝咁，將個客塞落個木箱度，然後一腳伸佢落去⋯⋯

至於點解可以咁大差異，根據官方講法，因為有時啲師兄師姐「踢單」，咁最接近嘅開始踢，個「波」就愈傳愈遠。不過有師兄師姐表示，明明自己近個客多啲，但係就唔知點解俾左一個冇咁近嘅司機，點解會知？咁啲相熟嘅師兄師姐會得閒報吓行踪吹吓水嘛⋯⋯咁啱大家又係喺附近喎⋯⋯你話呢？

另一樣搞笑嘢就係派單嘅時機。個台派單係參照GPS同地圖（自家地圖，不過同Google Map冇分別）。騎呢事通常發生係等緊單嘅時間。因為「單駁單」嘅時間係落緊客，你仲有時間睇/反應，甚至轉得切線。有時冇單，又唔可能成日（有地方）俾你打墩，咁就會周圍兜，去到燈口位，你都只能揀左/中/右是但一條。個台偏偏最鐘意係你轉左（右）時，俾另一個方向你，或者係燈口白線位（當你停最邊個條行車線）就叫你去另一邊。大佬呀！龍珠咩？瞬移咩？！點解會咁？因為Google Map只會顯示你你邊條街，但唔會顯示你係邊條線囉⋯⋯

最好笑，筆者覺得，個台會認為，司機兜個圈黎接客好似成件事高級啲咁。因為感覺上架車係特登黎接個客咁。筆者成日有咁嘅經驗，就係個台好鐘意係筆者駛過左「甲地」之後（特別去到十字路口中間），個台就會派張「甲地」上車嘅單俾筆者，最慘係你睇完上車地點個吓已經過哂反應唔切而兜個大圈接客。個種感覺就好似「希特拉都cut唔到有線」嘅希特拉揸哂掌頭咬哂牙咁款。揸車要時間要燒油，個客要等㗎！個客趕時間嘅，好就催吓你叫你快啲，唔係就直頭取消，又白行喇！

「大佬呀！你唔好咁痴線啦！」

【嗚巴軼事】

作者：車上人間

一個男人一架車，見盡香港人和事。

閱讀後覺得好，請多多讚好及分享～：）