【嗚巴軼事】智能手機叫車，前提係乘客本身嘅智能都要合格. . .

各位讀者如果有用過個台叫車，一定會覺得好方便。只要篤吓個地圖，揀埋服務類型，乖乖等等就有車坐，直頭簡單到一個點。筆者同你講，咁簡單嘅嘢都可以甩轆甩到九彩㗎！唔信？等筆者分享俾大家知。

第一，人還人，上車地點還上車地點。篤地圖呢樣嘢講就容易，實際操作可以話係易學難精。因為你要篤得準，司機先可以去到你個位置接你㗎。奈何呢？唔知係啲客手指太粗，定係求求其其篤左差唔多位就算，於是乎就會出現司機到左上車點，但係個客係另外一處乾等。其實呢，如果你自問手指太粗或者篤極唔準，其實係可以直接輸入地址，通常打字都唔會有錯，有錯嘅話，你搭返的士啦⋯⋯

第二，承上點，個客妄想司機知道你係邊然後黎接到你。呢種情況通常出現係遊客身上，由於外國叫車好盛行，所以順理成章黎到香港都會叫車。但係，佢哋都有一個外地人都會有嘅問題：唔識路。唔識路叫車唔係問題，最大問題係去到唔見人，打俾佢問佢係邊，附近有咩地標（舖頭），答你唔到之餘仲要補一句「I am not from here」。喂！阿哥！本地人有「本地千里眼」、「本地瞬移」呀？識讀心呀？知你係邊㗎？呢啲客筆者通常唔會浪費燃油再玩捉迷藏，直接要個客放低20蚊算數。

第三，啲客叫車個陣只會諗自己方便，完全唔理個位置係咪真係上到車，篤左落去就關人隱事。有一次，個客點左上車個位係九龍灣地鐵站出面嘅巴士站，稍為認識交通規例嘅讀書應該會知道，路邊巴士站除左巴士之外，其他車輛停泊會可以被定額罰款，啲客完全唔會理，照揀個度上車。如果個客企定定係度等，上車又夠快，都話可以大膽啲搏。唔係嘅，已經流住車等個客，反而個客又唔知係邊，仲要如果有巴士埋站，甚或有「慈母」行過。咁就多謝20大洋，係咁先。仲有一次，有啲地方，例如葵涌打磚坪街，晚上三不五時，會有「慈母」擺檔「踢車」。話說有一晚，有位「因航」空姐叫車，就係打磚坪街上車（應該係租工廈單位住），去機場開工。由於個度夜晚擺滿貨車，仲有慈母「擺檔」，咁筆者就通知佢要行前幾步先上到車。最後阿空姐咪直接截的士囉⋯⋯至於點解筆者知道個客係咩人去邊？筆者有打俾個客話落車接佢同佢拉行李，點知就睇住佢上的士囉⋯⋯

記住！司機係咪順利接到你，好睇你報嘅位置準唔準確，以至接載點嘅交通狀況同是否能夠有足夠空間同時間俾你上車。不過我知道講完都係冇用，因為天下西客一樣西。

【嗚巴軼事】

作者：車上人間

一個男人一架車，見盡香港人和事。

閱讀後覺得好，請多多讚好及分享～：）