人大咗先發現講得出「最鐘意過聖誕節」係一份奢侈

 

 

畢咗業都有幾年,亦已經踏入傳說中(女人)會開始急速衰老嘅年紀。星期一朝早,一如既往逼地鐵返公司,坐低一瞥電腦螢幕右下角嘅日期,先發現原來已經平安夜啦。節日前夕做到我就快死,平安?邊度平安啊睇過?心裡面只係記掛住聽日唔洗返工,終於可以訓晏啲,同埋office嗰啲騎呢佈置掛咗成個月終於可以拆。打開手機,只見本來每一年平安夜都會約出黎食飯交換禮物嘅中學同學群組,「我今晚有野做,遲join」、「今晚原來要做冬呀,我再覆你地黎唔黎到」、「我唔舒服,今晚都係唔黎啦,你地玩得開心啲」、「咁不如改期啦」,訊息此起彼落,冇一個有節日氣氛,冇一個會令我期待收工,冇一個令人愉快。從幾時開始聖誕節由最期待嘅節日變得如此沒趣?

自細細個開始,每一年聖誕節家父都會帶我出街感受節日氣氛,尖沙咀海旁睇燈飾、商場巨型聖誕樹、合唱團佈佳音、去屋企樓下嘅西餐廳食聖誕大餐,仲會一齊佈置屋企,開住財經台無限播放經典聖誕歌……對年紀小小嘅自己而言,呢一切都係值得期待一整年換來嘅快樂,所以細細個一到十二月就好興奮。特別期待學校搞嘅聖誕大食會,可以同同學仔交換(唔伏嘅)聖誕禮物、親手寫一張又一張聖誕咭,同埋食菠蘿腸仔。到後來大個少少,又開始期待同一班又一班嘅朋友去蒲、去倒數、同初戀情人睇燈飾影合照。所以以前你問我最鐘意嘅節日,一定毫不猶豫答你聖誕節。

然而由少年轉變為成人嘅心態,對十二月嘅期待只剩放假,同埋各大商店嘅christmas sale,就連天氣都變得唔再令人期待,買左嘅靚褸、頸巾、冷帽,到聖誕都未拎到出黎著,今日仲擔緊遮呀大佬。有氣力又仲攞到假或者可以去下旅行,冇嘅話其實都係得返兩日假,搞咩party約咩燒野食都係不了,我得閒你都唔得閒,忙嘅忙攰嘅攰逐個逐個甩底搞到大家冇癮傷感情就唔好,不如返屋企打機好過。有拖拍亦不見得好事,當商家愈來愈將節日商業化,聖誕節行街食飯做乜野都貴到死,想影下燈飾又勁多人,真係你影埋我嗰份。以前尚會花少少心思準備小禮物、整聖誕咭,人大咗有錢冇時間,只好物質搭夠,隨便買盒朱古力又敷衍了一年聖誕禮物。所謂節日氣氛,不再建基於人同人之間嘅交流互動,而只係商品同消費。如此節日又何以會再令人期待?

從來冇相信過世上有聖誕老人,不過我依然好懷念以前純真地期待十二月二十五號來臨嘅自己。細個嘅快樂好簡單,成人禮過後,簡單變得好奢侈。狂歡派對、浪漫燈飾不再,或者係時候多啲留喺屋企,陪吓就快退休嘅兩老食飯,同佢地傾多啲計。

 

作者:自田丌

自田丌
夢想係養一隻金毛尋回犬同一隻臘腸狗。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 188627
Date: 2018-12-24 19:25:18
Generated at: 2020-04-02 07:50:39
Permalink: https://www.vjmedia.com.hk/articles/2018/12/24/188627/人大咗先發現講得出「最鐘意過聖誕節」係一份奢