【嗚巴軼事】香港人，有錢去旅行，無錢叫車呀？

上次，筆者分享過乘客叫車嘅甩碌嘢。各位讀者，如果你以為去到上車地點就萬事大吉，今次又估錯了。單單係上車嘅短短幾秒（有時唔止）都夠嘔幾兩血⋯⋯

先介紹一下蠅量級——遲到。雖然今時今日個台有個「等候費」嘅玩意，即係司機到左上車地點後會自動倒數三分鐘，倒數完之後就每分鐘收2蚊（個台中間袋5毫），唔夠一分鐘就按比例計算。不過呢招對於「有錢就是任性」嘅尊貴客戶係冇用嘅。因為「我俾左錢㗎，你等我就應份」。如果有地方停低慢慢等，問題都不大，最慘係冇地方停，司機焗住要兜圈黎等，要果要兜個大圈先返得到上車地點就仲衰，嘥油嘥時間。

另外，有啲客就好過癮，鐘意玩超載。超載可以分兩種：第一種係人數。最簡單嘅例子就係五個人叫架五人車。其實個台係有得揀淨係叫七人車嘅選項，唔知點解啲客（可能貪平）就叫最平個隻（剛好筆者就係做最平個隻），於是筆者有時都接到呢種客。係度又提提大家，超載係犯法嘅，如果大家人多，想坐車又唔想花錢，可以選擇公共交通工具。而另一種超載係行李，通常發生係機場接嘅單，由於而家香港人去旅行大多數係打算將人哋成個國家搬返黎，但係就有錢去玩就冇錢叫車，最後又係叫架細車黎載啲大喼（講緊30吋個啲），黎到仲要嫌架車細（咁多行李，叫架七人車啦！）。

再惡頂嘅，去到個上車地點，由於個客冇行定出黎，司機睇唔到，行過左小小，個客唔肯行幾步，仲要司機自己取消（因為連20蚊都唔想俾）。有一次筆者去九龍城南角道個邊接客，由於係夜晚八、九點嘅時間，路邊又多車，又要搵地方停，個客話見到架車但又唔行出少少示意。咁筆者就叫佢不如稍移玉步啦，佢點個位路邊有車，條路又車來車往，行前幾步就到。但係個客唔肯，筆者本著服務精神，就兜返個圈接返佢，去到對面馬路，又話唔係佢個位置，要筆者取消，話司機取消就唔會收佢錢。（唔好痴線啦，係你幾步範圍玩左超過五分鐘，就算司機取消都有錢攞㗎！）

最後，筆者見識過最痴線嘅，莫過於啲客玩兩頭蛇，即是同時用個台叫車，另外再叫的士，邊個早到上邊個。話說筆者去西貢接個西人（歐洲白人，不過都係西嘅），個陣由於係夜晚，村裡面又有街燈，又睇唔到門牌。而筆者車黎剛好有架的士跟尾，當時筆者已經好奇，何解架的士跟左筆者架車行咁耐嘅？筆者架車駛個客間屋前少少發現冇路，應該都即係到左。咁咪停低諗住等等，點知架的士好快就走左，筆者心知不妙，即時打俾個客，個客真係上左的士走左。當刻我真係有幾百萬字粗口湧緊出黎⋯⋯

作者：車上人間

一個男人一架車，見盡香港人和事。

閱讀後覺得好，請多多讚好及分享～：）