我嘅第一次扑性Day

我嘅第一次就係發生喺十幾年前嘅Boxing Day。

嗰一年我中五，識左初戀男朋友。以我讀女校黎講，中五初戀唔算早，都唔算遲。個男仔同我住同一個屋苑，朝朝早等巴士返學都見到佢。佢只係高我少少，但個樣係我鍾意嘅類型，眼細細鼻高高，側面睇有啲似周國賢（周國賢第一隻碟溫室氣球個封面嗰個樣）。除咗個樣啱我口味，因為我等巴士條隊喺佢條隊後面，所以我仲留意到佢著住校褲都顯得個蘿幾立體（利申：基）。

至於我點樣識到佢，其實有啲複雜。簡單黎講就係佢係籃球健將，日日都落樓下打籃球，而我就會喺附近離遠咁睇佢打籃球。有一日佢着住校隊波衫打波，俾我見到佢件波衫後面有佢個全名， 於是就好似哥倫布發現新大陸咁興奮打上Xanga（我嗰個年代係興緊Xanga，唔知係咩嘅後生仔女當係打電報啦下！）點知果條友居然會上網search自己個全名（其實幾自大先會咁做？）結果佢就睇到我Xanga，輾轉之下我地就識咗啦！

OK！終於可以入正題！話說嗰時識左兩三個星期，都未正式話一齊，但不時會約喺放學見面，大家都知互相有啲好感。適逢大家都中五要預備會考，聖誕假期梗係溫書啦！而我屋企又成日無人，真係好適合孤男寡女一齊「溫書」。我間房好亂，基本上係得張床先有位可以坐低「溫書」，當然喺張床度坐左冇耐，我地就開始溫Bio。

首先就係學習人類口部嘅結構。我哋嘅嘴唇分上唇同下唇，擘大口入面有牙肉牙齒，最重要係舌頭。舌頭嘅用處有好多，例如：lam額頭、lam黑頭、lam膊頭、lam膝頭……（下略，提我遲啲寫返篇「舌頭在床上的運用」）總之喺我哋探索緊彼此口部結構嘅時候，我就係不斷taste到佢響屋企樓下啱啱食完嗰個咖喱豬扒米線嘅味。所以我要回憶初吻嘅味道，去食碗咖喱豬扒米線就OK。

上文講到佢係籃球健將，基本上我睇佢打籃球嘅時候已經見識到佢強勁嘅臂彎，仲有佢着住校服都顯得非常立體嘅股肌，估唔到佢兩舊胸肌同埋六舊腹肌發育非常健全。對方頭胸腹都有齊，而本人就可以話係要嗰樣無嗰樣，無波無腰無蘿無腿（無長腿得火腿！），真係非常失禮！所以由除衫嗰一刻，我已經覺得蝕抵嘅係佢唔係我！

面對着手臂胸肌腹肌同埋股肌，嗰刻我絕對有選擇困難症，對手同對眼已經忙到不得了。相反對方對手應該好得閒，所以佢一隻手已經開始探索地底下嘅洞穴，並且想發掘新嘅水源。而佢另一隻手，就引導我去檢查佢嘅洞穴鑽探機嘅長度、粗度同埋堅硬程度。

所有嘅感知同體驗對我黎講都係第一次。對於一次過有極多嘅外來資訊同埋自身感覺嘅衝擊，我嘅腦部應接不暇，只能夠跟隨住對方嘅推進而行。

終於到咗最緊要嘅時刻，洞穴鑽探機已經準備好想進入地底下嘅洞穴，但突然對方發現前方有阻礙，並且立刻要求增援！「可唔可以幫幫手？」佢同我講。對於冇經驗嘅我黎講，嗰一刻真係唔知應該要做啲咩先幫到佢，同埋講衰啲，其實嗰時我連下面有幾多個窿我都唔知，所以嗰刻真係呆撚左。

其實對於十幾歲嘅我黎講，一直對第一次充滿咗期待，但同時都充滿左驚恐，因為總係有好多小說情節、電影橋段、或者警訊案件重演都係會話俾你知女人嘅第一次係處女膜會裂開、會好痛、會流血，總之成件事就好似一定係好暴力同好血腥咁。去到我呆撚咗個一刻，呢一份嘅驚恐終於戰勝左我嘅期待，「不如下次先啦，唔好咁急…」雖然對方應該係萬分不願意，但勉強無幸福，所以嗰一日就就此作罷。

雖然喺Boxing Day嘅第一次扑嘢唔係咁成功，但「革命尚未成功同志仍需努力」，結果第一次都係俾咗初戀男友，至於真確嘅日期就真係唔太記得。但鑒於喺Boxing Day扑嘢實在太過合理，所以我就將我自己嘅第一次假訂喺Boxing Day，方便一年一度懷緬一下當時嘅嗰一份純真同青澀。完。

作者：萬忽瑪利亞

搵個人去愛太難，搵個人做愛易D。

閱讀後覺得好，請多多讚好及分享～：）