環保喺香港已經走火入魔,你數下自己屋企收埋幾多個「環保」袋?

 

 

近排大家見到隻海龜插住支飲管,突然於心不忍話要唔再用飲管。咁無理由要人唔用飲管飲有冰嘅野咁白痴架嘛,所以就有人發明左可以再用嘅飲管(鋼/玻璃…)。

但呢樣野到左香港就走火入魔。大家記唔記得當初可再用飲管,係拎黎做咩?係比用家自備飲管用。出街自備返到屋企洗返乾淨(先唔理洗唔洗得乾淨)。佢唔係比你商業用。

但係就總係有啲天才會覺得飲管可以再用好環保,我決定我間餐廳都用先。結果係一個設計比家用嘅產品登上左商業舞台。首先我100%肯定同你講,你支飲管一定唔撚乾淨。先唔好講啲咩,我地信下製造商先。佢會話用醋煲啲飲管再等佢自然風乾。自然風乾呀,你間餐廳諗住入幾多不銹鋼管呀?其次,呢啲可再用飲管生產所用嘅資源其實係比膠飲管浪費多好多,結果因為要比商用而更加大量生產。本身係一人一支自備,呢家每間餐廳都要入多幾倍去預備洗緊、又風乾(姑且當佢真係會風乾)。咁咪仲浪費。

不過環保撚係唔會心息嘅,就會開始話咩飲管倒晒落海etc…。咁不如大家睇下10年前嘅不織布袋。個時又係有人話膠袋好唔環保,咁不如大家自備膠袋啦。個時膠袋嘅解決方案就係不織保袋aka環保袋。咁個時宣傳非常成功,每間超市、工展會、入會贈品、買滿幾多送幾多呀,都會送個不織布袋比你,去鼓勵大家用不織布袋。但結果係點?你係自己屋企揾到幾多個唔用收埋左嘅不織布袋呢?根本人地就係設計比你一人一個,頂多買多兩三個後備。自從佢商業化後,買咩做咩都送一個比你。每個人都幾十個收埋係屋企。結果個時先有人講,其實不織布袋生產過程係比膠袋浪費唔知幾多倍嘅。哈哈,個時大家先知自己有幾浪費。

我唔否認環保袋/可再用飲管係好環保,但僅限個人使用。呢啲野只要商業化,就會走火入魔,環保袋就係一例。所以各位環保撚,唔該高抬貴手,走塑還走塑,走管還走管,麻煩叫商家唔好入可再用飲管。

另外有件事都想環保撚幫下忙,其實冰都好唔環保,我啲小學雞想飲杯汽水姐,麻煩幫下手叫佢地走埋冰,有冰無飲管係飲唔到汽水,只係飲到冰水。

 

作者:緋色雪夜

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 188690
Date: 2018-12-27 15:50:58
Generated at: 2020-06-02 16:44:03
Permalink: https://www.vjmedia.com.hk/articles/2018/12/27/188690/環保喺香港已經走火入魔,你數下自己屋企收埋幾