【首先我反對港獨】淺談中國特色社會主義

政治 / 最新文章綜覽

 

近日我不斷思考「習近平新時代中國特色社會主義思想」究竟係一樣乜嘢嚟,點解中國近年擁抱市場經濟,表面上尤如資本主義社會,但仍然堅持要掛住「社會主義」牌頭呢?

資本主義社會某程度上係幾犬儒嘅,除咗搵錢之外就冇咩特別價值觀 [1]。有趣嘅係,其他現代西方人權思想,可以話係資本主義嘅延申。只有喺產權同自由都受到保障[2],每個人都可以平等地位喺市場競爭嘅情況下,財富先會增加得最快[3]。所以,提倡現代西方人權思想嘅原意或者係出自「善念」,但我認為呢個現像亦可以以資本主義去解釋[4]。喺不減經濟效率嘅情況下,所有傳統價值都可以抛棄。現代男人可以湊仔,女人可以做 CEO,大家實踐自由思想之餘,又提升經濟效益,喺「經濟效益至上」嘅世界,絕對係N贏局面。

喺呢個假設之下,我哋就可以重新理解「中國特色社會主義」同資本主義有咩分別:錢唔係最重要。咁究竟乜嘢係最重要?我之前諗咗好耐都唔明,但好在習大大已經大方俾咗答案:「中国共产党领导是中国特色社会主义最本质的特征」[5]。

喺鄧小平年代,中國經歷文革之後國力衰弱,提倡改革開放嘅人,好明顯係深知西方資本主義[6]可以富國強兵[7]。所以中共以「實踐是檢驗真理的唯一標準」嘅哲學原則,推翻佢哋幾十年嚟嘅原教旨馬克思主義,喺共產主義破產前夕成功轉型,冇走蘇共嘅路,一來走得快冇沉船,二來亦都冇學戈爾巴喬夫玩西方民主,而係繼續摸索「中國特色社會主義」嘅道路。

當其時嘅「中國特色社會主義」同「走資」可能冇咩分別,都係放開市場,搵錢至上,甚至官員變咗好似企業主管咁樣要跑數,睇業績升遷。但究竟中共係咪行緊「資本主義」呢?又唔係。資本主義「最本質嘅特徵」其實係個人自由,而「個人自由」同「黨的領導」係唔兼容嘅。所以,中國行市場經濟之餘唔開放政治自由,而呢三十幾年嘅實踐之中,中共檢驗出嘅真理係:中國特色社會主義仲把炮過資本主義,人哋幾百年慢慢累積嘅經濟實力,中國幾十年就做到。

有強大嘅實力之後,用嚟做啲乜呢?去到呢個位,資本主義嘅犬儒之處就出現嘞。資本主義會叫大家繼續搵多啲錢,繼續提升經濟效率,直到永遠。大家唔好成日以為我講緊反話,當人民已經富足嘅時候,繼續無止境提升效率,資本主義最終會出事嘅。點解GDP係咁升但我哋嘅工作時間會越嚟越長,點解不愁衣食嘅人會日日OT,都係呢個問題嘅表徵。

中國特色社會主義就唔同嘞。黨叫你搵錢,你就要搵錢;黨叫你停,你不得不停[8]。搵錢唔係終極目標,而只係實踐「中國夢」、「民族復興」嘅手段。講到底都係中華民族喺《小器簿》入面有幾筆賬目未清,同埋想同全世界講「中國特色社會主義」好撚把炮,仲勁過資本主義。甚至係,想證明俾世界睇中國傳統儒家精英主義治國係work架[9]。好喇,民族復興之後又點?係咪繼續賺錢?我真係唔知。不過「中國夢」嘅 timeline 去到2049年,到時先算啦。

何況,如果比較「中國特色社會主義」同「資本主義」嘅 existential crisis,一定係後者最急切。根據我上面嘅論述,人權自由其實係提升經濟效益嘅副作用。但根據主流西方學術論述,人權自由係「與生俱來」,冇可能因為「社會經濟效益」而存亡。我哋今日稱之為「左膠」嘅立論,其實係「與生俱來論」嘅自然延申,好多唔合經濟效益嘅論述已經開始喺比較「進步」嘅西方社會中進行試驗。明眼人當然知道咁樣落去會製造若干社會問題(例如影響經濟效益)。但呢啲都係取捨嚟:如果西方社會真係如佢哋所稱係相信人權自由「與生俱來」,佢哋應該可以選擇捨棄經濟效益。究竟係咪會咁樣發生呢?呢壇花生非常好食,實情係暫時未有清晰答案。可能我假設「資本主義先於人權」係錯呢。

至於我自己就梗係置身度外啦,呢啲西方嘢都唔關我事。咁啱香港主權移交之時,正值中國同西方所行嘅市場經濟路線係兼容,所以1997年大致上成功接軌。香港作為中國一部份,日後當然係會慢慢跟隨中國特色社會主義路線。資本主義50年不變嘅年期係去到2047年,喺香港人眼中或者50年(溫馨小提示:剩返29年)係好長,但喺中國二千年史觀入面只不過係曇花一現。好多香港人對「政治」嘅睇法都係好急進,大概係讀歷史冇讀通。香港嘅政客嘅「政治生涯」已經相對算係長,老屎忽死都唔退,加加埋埋都可以有四五十年。但歷史上真正重大嘅改變都唔係幾十年之內發生嘅,而係過百年慢慢累積嘅嘢嚟。靠嘅唔係一廂情願,而係遠大嘅目光,一個可以號召到人,同時又可以慢慢實踐嘅願景。

做到呢樣嘢好難,我淨係諗下年個市嘅走勢都諗到頭爆,但真正嘅偉大思想家係可以一句說話奠定往後幾百年、幾千年嘅政治制度。至於一般凡人,要真正深入理解啲理論背後嘅理論,論述中秘而不宣嘅嘢, 已經好唔容易[10],睇住香港班自以為識政治嘅人[11]東施效顰,以為亂咁照搬幾個西方政治理論嚟香港就啱使,真係唔知講乜好。睇返呢幾十年香港,真係每一步都行錯。馬後炮好多人都識,不過有啲人甚至連「實踐是檢驗真理的唯一標準」都唔接受,睇嚟香港短期[12]內都冇運行。希望有少數人可以從錯誤中學習,過多一百幾十年[13],或者有轉機都未定。

最後當然係跟返潮流講句:#首先我反對港獨。

多謝大家收睇。

[1] Adam Smith 喺《國富論》一早論證咗「大家一齊盡量搵多啲錢」嘅道德根據。
[2] 所以「法治」應運而生,保障所有人嘅自由同權利。
[3] “I believe, that the work done by freemen comes cheaper in the end than that performed by slaves.” (Smith, 1776)
[4] 例如反歧視咁,本身就係令人力資源市場更有經濟效率嘅方法嚟。
[5] 中國憲法(2018年)第一條
[6] 呢度所提及嘅資本主義包含人權法治
[7] Marx 應該都有引用 Smith(好似係,利申冇讀過 Marx…
[8] 震驚十三億人的結局!馬雲都認同我呀!
[9] 你咪問我點解得出呢個結論,一來我最近好似唔知邊睇過啲咁嘅嘢,二來用「非中文人」嘅眼光審視中國歷史同現代中共模式就會得到呢啲結論,香港人對「儒家」同「中共」太多迷思好難講落去。
[10] 我都係聽習大大話認真研究先略有所成咋!
[11] 唔知點解乜柒都唔識嘅人好鍾意開班教人⋯
[12] 中國特色 time scale
[13] 中共成立到而家都差唔多成一百年,最進步嘅黨都要搞咁耐先救到國,所以使乜急。

作者:散彈一號

散彈一號
全職文字工作者、應用哲學家。對「邏輯一致性」、「系統複雜度」之類的偏門學問獨有心得。在美利堅合眾帝國邪惡資本主義集團的領導下,嘗試改變世界。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 188699
Date: 2018-12-27 18:21:26
Generated at: 2020-10-30 10:12:39
Permalink: https://www.vjmedia.com.hk/articles/2018/12/27/188699/【首先我反對港獨】淺談中國特色社會主義