【嗚巴軼事】又話「將在外，君命有所不受」，個客屈我兜路可以點拆先？

雖然筆者同其他同台嘅師兄師姐一樣，都屬於職業司機，認路方面都係專業嘅一部份，不過，香港地所謂「彈丸之地」都十九幾萬條街，無數咁多個路口，要認得哂都真係唔容易。而且，同的士唔同，我哋基本上北起沙頭角，南至赤柱，東起清水灣，西至流浮山，基本上都會去哂。

正所謂「條條大道通羅馬」，就算去一個地方都可以有兩、三條路徑可以行，甚至過海都可以三條隧道任揀，就算個台會提供路徑指示，司機都可以唔跟。加上每個司機（乘客）經驗都唔同，可能同一個目的地，司機用開A呢條路線，客坐開係B路線。好多時行邊條路都可以係瀨嘢位。

筆者同其他師兄師姐都有類似經驗，明明行開平時個條路，個客都會投訴（通常當面鬧）話個司機兜路。其實，好多時係兩條路路程差唔多，例如天后去牛頭角，你話行紅隧去又得，行東隧去又得，價錢其實又差唔多。但如果個客話，「我係行開紅隧，點解你行東隧？」你答佢平時係咁行就一定仆直，加上個台「純粹幫客」嘅文化，收警告甚至停幾日機係必然結果。

咁點拆解？第一，個客一上車要即刻確認左點行，行咩隧道先開車。其次，如果個客話「是但，你話事」，千祈唔好天真嬌上身，要補一句「咁我跟導航行啦」。正所謂有咩唔對路，個句「跟導航行」已經擋左好多嘢。第三，揸多啲，認吓路。

當然，筆者都遇過唔少好嘅客，邊啲街有「了愣」位、捷徑都會話俾筆者知，教筆者行。其實，路嘅嘢邊認得哂呀，大家互相尊重，幫吓手，咪可以安全快捷去到目的地囉。

【嗚巴軼事】

作者：車上人間

一個男人一架車，見盡香港人和事。

閱讀後覺得好，請多多讚好及分享～：）